Hpakant Tamahkan Ginra Na Hpyen Koi Yen Mung Masha Ni Malu Masha Nga Shara Grai Yak Hkak Nga Ai Lam

Pajau Media Channel

7th March, 2024

Hpakant Tamahkan ginra gasat gala majan hta mung masha dum nta wan nat hkrum ai gaw ya aten du hkra rai yang lawk (6) daram du hkra hkru lawm mat ai re lam chye lu ai.

Gasat gala majan grai sawng nga ai madang re hte dum nta wan nat hkrum nna nga shara nlu mat ai mung masha ni ya aten ginra hte ni gahtep ai shara hkan sha koi yen nga ma ai rai nna ya aten malu masha grai yak hkak nga ma ai lam ginra masha ni tsun ai kaw na chye lu ai.

Ginra masa hte seng nna mung masha ni tsun ai hta “anhte mare kaw na pru wa ai gaw March (3) ya kaw na rai sai, Myitkyina de gaw praw (5) ya shani du wa ai, mare masha ni hte rau PDF ni kapyawn pru wa na tsang ai majaw Myen hpyen dap kawn hkawm sa hkrun lam ni pat kau ai re, ya anhte hpung ni kaw marai (30) daram re, ma kaji hte kanu num ni (23) daram lawm ai ngam ai gaw ramma ni re” nga n nna ginra masha langai tsun wa ai re.

Ya aten Tamahkan kaw nna pru wa ai mung masha n kau gaw nga shara mung n lu malu masha mung nlu rai nna yak hkak nga ma ai re lam, n kau gaw tinang du taw ai shara hkan shani nchyang bungli ni galaw rai nna hkyak hkyak ra kadawn nga ai malu masha hpe mai byin ai masa hku hparan nga ai lam hprawng koi yen mung masha ni tsun ai re.

Hpakant Tamahkan ginra de lai wa sai Feb (27) kaw nna KPDF pawng hpawng hpyen hpung ni htim gasat majan hpang wa ai re hte March (3) ya shani gaw mung masha dum nta hpe Myen hpyen dap kawn wan nat jahten kau ya ai re, March praw (7) ya jahpawt kaw nna ginjaw ginra de mung W.P mungdan shang lawt hpung KIA kawn htu shadut majan baw dat ai re hte ya aten majan grai laja nga ai masa re lam chye lu ai.