Pajau Media Channel
4 th, March, 2024
Hpakant dap ba (9) Tamahkan ginra kaw gasat gala majan gaw ya aten du hkra grai laja nga ai masa re hte March (3) ya shani hta mung Mung shawa dum nta wan nat jahten hkrum ai hta dum nta (60) hkawt hkru lawm mat ai lam ginra masha ni tsun ai kaw na chye lu ai.
Tamahkan ginra hta March praw (4) ya shani du hkra Hpyen n-gun jat nga dingyang re hte n bungli bawm ni hte mung matut manoi gap gasat nga dingyang re lam mung chye lu ai. Wan nat jahten hkrum ai gaw Tamahkan lam maw kaba Lawk (1),(2),(3),(4), (5) hkan na mung shawa dum nta (60) jan rai nna, nbungli bawm ni jahkrat nga dingyang re majaw kade daram madang byin wa na ngu hpe gaw matut naw sagawn nga dingyang re. Dai ginra masha ni gaw ya aten ni nawn ai mare kahtawng jinghku jingyu ni hte hpung gyi jawng ni hkan koi yen hkawm nga ai lam hpyen koi yen mung masha langai Pajau Media de tsun ai.
“Anhte na nta gaw Lawk (3) kaw re, wan hkru mat ai kaw lawm mat sai nga shiga gaw na lu ai. March (3) ya shani du hkra rai yang dum nta kru shi a lahta rai sai, ya gaw yawng asan re ai pa kaba sha ngam sai ”.
Hpakant Dap Ba (9) ginra de gasat gala majan byin hpang wa ai February (26) ya kaw nna rai sai re hte mung mare masha ni hpe Myen hpyen dap kawn mare kata kaw mu mamu masha hpe gap sat na nga tsun jahkrit ai hpang mung masha ni yawng hprawng koi yen ra mat ai re lam mung chye lu ai.
“Myen hpyen dap maga kawn mare kata masha mu ai hte gap sat na ngu shiga ni mawng wa ai hpang law malawng gaw hprawng yen mat ai, gwi ai ni nkau langai lahkawng chyawm n ta sin na matu nga ma ai, tamahkan makau grup yin mare kahtawng hkan na ni mung yawng hprawng koi yen mat sai, ya aten jinghku jingyu ni hte hpung gyi jawng hkan shanu nga ai , n kau gaw nam hkan mai byin ai hku ginsum gap rawng nga ai ” nga nna hprawng koi yen mung masha ni tsun dan ai re.
Hpakant Tamahkan ginra gasat gala majan byin ai bat mi jan daram na wa sai rai nna myen hpyen dap kawn hpyen n-gun jat bang nga dingyang re sha n-ga lak nak kaba nsen ni mung dai ni du hkra ngoi nga dingyang re lam ginra masha ni tsun ai. Tamahkan ginra hta byin ai gasat gala majan bat mi jan laman hprawng koi yen mung masha hkying mali jan nga sai lam mung chye lu ai.
Comments