Pajau Media Channel
June 28, 2024
Jinghpaw mung daw, Hpakant-Seng Tawng ginra hta ndai laman gumshem Myen hpyen dap ni kawn hpyen masa shamu shamawt ai lam jahkring hkring galaw wa ai hte hkrum katut majan mung jahkring hkring byin nna, asak sin sum ai masha law wa ai lam chye lu ai.
June shata nhtoi 27 ya shani ka-ang aten, Seng Tawng mare makau, Hpaya Kung(ဘုရားကုန်း) hta dap jung nga nna hpyen n-gun 30 grupyin nga ai gum shem Myen hpyen dap hte KIA/KPDF pawng hpawm hpyen dap lapran gasat gala majan laja wa ai hte Myen hpyen dap maga kawn mung Drone hte shara shagu yu hkawm nga ai lam, matut chye lu ai.
Lai wa sai June shata nhtoi 26 ya shani hta mung balik kawng hpe KIA/KPDF pawng hpawm hpyen hpung ni Drone hte gap gasat ai hta balik du 7 hte hpawn marai 12 asak si sum nna, marai 6 hkala hkrum ai lam nga ai re.
Balik hte Myen hpyen dap pawng hpawm dap jung da ai Seng Tawng balik dap hpe KIA kawn Drone hte bawm jahkrat gasat ai lam re hpe mung matut chye lu ai.
Ginra masha ni tsun ai gaw, ndai laman Seng Tawng grup yin hta June shata nhtoi 25 ya shani kaw nna Myen hpyen dap ni hpyen n-gun hte hpyen man shamu shamawt wa ai lam, KIA pawng hpawm hpyen hpung hte mung jahkring hkring gasat gala majan byin ai lam nga ai rai nna dai ginra na mung shawa ni mung hpyen man shamu shamawt lung wa ai majaw grai hkrit tsang ai hte maja nga ai lam, tsun dan ai re.
Ya aten Seng Tawng ginra hta lahkawng maga na lak nak hpung ni kawn hpyen masa shamu shamawt lam laja nga ding yang re hte Myen hpyen dap kawn lak nak kaba gap shadam bun ai majaw Seng Tawng mare hte Maw Shan mare na mung shawa marai 14 hta nyawm, hkala hkrum lai wa sai rai nna Lawng Hkang mare na maw daw, cycle dut ai seng hta mung lak nak si hkrat kapaw lai wa sai re hpe chye lu ai.
Comments