Pajau Media
9th October, 2024
Hpakant, Seng Tawng mare kaw gasat gala majan byin ai shata mi na ai hpang October 8 ya jahpawt daw hta Seng Tawng Lucky Men Hotel kaw dap jung shara jahkrat nga ai myen hpyen dap hpung ni hpe KIA pawng hpawm hpung ni kawn htim gasat zing madu kau lu sai lam chye lu ai.
Seng Tawng majan hta Myen hpyen dap maga na bawng masha hte hpawn lak nak rung rai law law hpe zing madu la lu sai lam, majan hta myen hpyen dap maga na si sum ai lam law ai hta marai kade asak si sum ai ngu hpe tup hkrak gaw nlu tsun shi ai lam chye lu ai.
Hpakant ginra kata lai wa sai September 4 ya daram kawn gasat gala majan byin hpang wa ai rai nna Hpakant hte deng 6 daram tsan ai Seng Tawng mare Lucky Men Hotel kaw dap jung nga ai Myen hpyen dap hpung ni hpe September 7 ya kawn htim gasat hpang ai hta October 8 ya jahpawt daw hta gaw padang dip zing madu la lu sai re hpe mung chye lu ai.
Hpakant Balik dap hpe gaw September 12 ya shani zing madu la lu sai hpang Seng Tawng ginra de matut manoi gasat gala majan byin ai hta Myen hpyen dap kawn Jet nbungli bawm wa jahkrat bun ai lam, lak nak kaba hkrup mara gap bun ai majaw Mung masha marai 30 jan daram asak si sum nna dum nta mali tsa hkawt wan hkru hkrum ai lam chye lu ai.
Hpakant ginra gasat gala majan a majaw Mung masha 6,000 jan hpyen yen hkawm ra mat ai re hta ya aten malu masha tsi mawan grai ra kadawn nga ai lam mung chye lu ai.
Comments