Pajau Media
14.1.2025
Myen hpyen dap gaw ndai laman Jinghpaw mung hta gasat gala n byin ai ginra ni hkan nbungli hte laja lana htim gasat nga ai rai nna January 13 ya shani Hpakant San Hka mare, Mazup Yang mare mayan de nbungli bawm (7) lang wa jahkrat bun ai hta n kapaw shi ai nbungli bawm langai ga kaw naw lup nga ai re lam chye lu ai.
Myen hpyen dap kawn nbungli bawm wa ja hkrat ai hta San Hka mare Mung masha dum nta na namdum dingsa kaw Pound 500 grup yin nga ai nbungli bawm langai wa hkrat lup rawng nga ai re hte ntsa lam htu yu ai hta daw mi ga kata de naw lup nga ai re majaw shaw la na matu yak hkak nga ai masa re lam chye lu ai.
Nbungli bawm hte htenza mat ai ginra de lit nga ai ni kawn gawan yu ai hta n kapaw shi ai bawm hpe mu lu ai re lam, dai hpe KIA maga kawn mung wa yu ai raitim shaw jasan na matu tsang ra ai masa re majaw garai n lu shaw shi ai hte dai ginra na Mung masha ni mung hkrit tsang nna gan koi yen nga ai re lam chye lu ai.
Myen hpyen dap gaw ndai laman gasat gala n nga ai Jinghpaw Mung maw ginra ni hpe nbungli bawm wa jahkrat bun nga ai gaw Maw ginra ni gaw KIA a madung shang gumhpraw shang ai shara ni re ngu mu mada ai majaw ya na zawn dingsa gasat wa ai masa re nga nna Jinghpaw mung masa maram masam nga ai salang ni tsun dinglun nga ma ai re.
Jinghpaw mung kata Mung masha hpe masat shingte tawn nna Myen hpyen hpyen dap kawn nbungli bawm gap bun ai majaw January 10 jan ya laman hta sha Mung masha marai 20 jan asak si sum nna marai 30 daram hkala hkrum ai lam shiga ni hta tang madun da ai kawn chye lu ai.
Shiga – Pyilan U
Comments