Pajau Media
26.11.2024
N dai bat laman Hpakant shang wa ai Pan Din mahkrai kaw Myen hpyen dap kawn hpyen n-gun jat shamu shamawt wa ai majaw lai wa lai sa Mung masha ni shimlum lam myit tsang nga ai hte hpyen masa shaja hkat wa na hpe mung myit tsang nga ai lam Hpakant ginra masha ni tsun ai.
“Mi kaw na Balik ni dung ai shara gaw rai nga, raitim n dai laman gaw hpyen n-gun jat nna bai shamu taw sai. Hpyen masa shajin wa ai masa mung she n rai i. Lai wa lai sa Mung masha ni hpe hkap jahkring jep joi gumhpraw hta ai lam ni dingyang galaw nga ai.”
Hpakant numshang kaw na Pan Din mahkrai gaw Hpakant tatma makawp mung re majaw hpyen dap wang ni shagreng, shamu wa ai masa re lam, ya aten Myen hpyen dap gaw hpyen dap shara grup grup Kaduk htu ai lam, Kai Chyan bungli galaw shangun ai lam hta Ka-ni nanghpam lu sha ai masha ni hpe shanhte a lagaw lata tai jai lang nga ai re hpe mung chye lu ai.
Ya aten Myen hpyen dap shara la nga ai Pan Din mahkrai n pu hkan Ka-ni nanghpam lu sha dut mari ai masha grai nga ai raitim ahkyak la ai lam n nga ai hte shanhte a bungli ni hta she jai lang nga ai re lam chye lu ai.
Myen hpyen dap gaw lai wa sai August shata laman byin ai Seng Tawng Lucky Man Hotel gasat gala majan hta mung Ka-ni nanghpam lu sha ai masha ni hpe Mung masha ni a dum nta hkan na tinang ra ai arai ni hpe la shangun nna dum nta wan nat shangun ai lam ni galaw lai wa sai re.
Ya aten Myen hpyen dap gaw Hpakant ginra kata sha hpyen n-gun jat shamu shamawt wa ai majaw lai wa lai sa galaw nga ai Mung masha ni sadi maja let nga ra ai lam Lit nga ai ni kawn tsun da ai lam nga ai sha n-ga ya aten Jinghpaw Mung kata Nmawk hte Waimaw ginra mayan de mung hpyen n-gun jat shamu shamawt ai lam ni galaw nga dingyang re hpe mung chye lu ai.
Comments