Pajau Media
13 January, 2025
Thadar U(တံတားဉီး) de na lung wa ai Myen hpyen dap Jet nbungli gaw January 13 ya jahpawt hkying 10:44 Am grupyin hta Hpakant Lawng Hkang makau Sanghka mare hte Mazup Yang mare mayan hta nbungli bawm (7) lang wa gap bun ai majaw Mung masha law law asak si sum ai lam ginra Mung masha ni tsun ai re.
Nbungli bawm gaw Sanghka gawdin pa makau na Mung masha dum nta kaw langai, Sanghka Hpunggyi Jawng kaw langai, Sanghka kaw na U Kyaw Khai a nta kaw langai, U Tan Win a nta kaw langai, U Taw Zin a nta wang kaw langai, Mazup Yang Myeza pung sa wa lam kaw langai hte Mya Ooyin company wang kaw langai wa hkrat ai lam chye lu ai.
Nbungli bawm a majaw Mung masha dum nta hten za hkrum ai hte Mung masha asak si sum ai 8 a lahta nga nna marai 20 jan hkala sawng ai lam ginra Mung masha ni tsun ai re. Mabyin masa pup hkrak hpe tsun lu na matu sagawn nga dingyang rai nna law malawng asak si sum hkala hkrum ai ni gaw lung seng tam bungli galaw nga ai ni hte hkawm sa hkawm wa Mung masha ni re lam chye lu ai.
Myen hpyen dap gaw ya aten gasat gala majan nbyin ai shara hkan nbungli bawm hkrup mara gap bun ai majaw masha hpawng chyawm ai poi lamang ni n galaw yang kaja ai nga nna ginra myit su salang ni tsun hpaji jaw da ai re.
January 13 ya jahpawt daw hkying 1:15 Am aten daram hta Hpakant Sate Mu Sabaw mare kata na Yatanar Adipadi Company ni kawn ru tawn ai Myeza ga shingbut hte gayau ai hkum pup nawng baw wa ai majaw Sabaw mare kaw na htinggaw (20) grupyin a dum nta hte lam makau hkan gat dut nga ai ginsum 30 daram lup lawm mat ai lam chye lu ai.
Myeza ga shingbut a majaw asak si sum ai Mung masha jahpan tup hkrak chye lu na matu sagawn nga dingyang re hte mabyin masa hpe Pajau Media kawn matut sagawn tang madun sa wa na re.
Shiga- Pyilan U
Comments