Pajau Media Channel
15th March, 2024
Hpakant sa lam, Ka Mai, Kawng Ra makau mayan hkan shanu nga ai mung masha ni gaw hpakant lam mayan de hpyen masa grai shaja hkat wa ai majaw dai ginra mayan hkan na mung masha kadai mung kadai tinang shim dum ai shara de htawt sit hprawng yen hkawm ra mat ai re.
Dai ginra hta n dai laman Myen hpyen dap ni kawn mung masha ni nga ai mare makau mayan hkan shara jahkrat nga wa ai majaw hpyen masa gaw lakawng maga grai shaja hkat wa ai re. Ka Mai, Kawng Ra hkan na mung masha ni gaw nam de hprawng yen ai ni yen, ni nawn ai jinghku jingyu ni hkan sa shanu nga ai ni mung nga ai lam hprawng koi yen nga ai mung masha langai tsun ai.
“Anhte ni mare ting ngu na daram nam de hprawng yen nga sai, yawng dum bri dum bra rai taw ai, nam de hprawng ai ni gaw hprawng rai nga ga ai” nga nna amyu shayi langai tsun ai.
Myen hpyen dap ni gaw Kawng Ra mare kata na hpunggyi jawng, lawu tsang jawng, hte Kamai mare num shang lam braw hkan shara jahkrat nga ai re hte Ka Mai Byuha Kawng (ကားမိုင်း ဗျူဟာကုန်း) kaw nna mung laknak kaba hkrup mara gap bang ai lam, Drone bawm jahkrat bun ai lam ni nga ai re hpe mung chye lu ai.
March (14) ya shani hta mung gasat gala majan byin na hpe myit tsang ai majaw hprawng koi yen hkyen ai mung masha ni hpe myo num shang kaw pat shingdang tawn ai hte hprawng yen yang mare wan nat kau na nga nna tsun ai lam ni nga ai re hpe mung chye lu ai.
Ka Mai Kawng Ra lawk mung mashani sha n-ga Htoi San Yang mare, Namsi In mare hte Ka Mai ginra mung mashani gaw gasat gala majan byin wa na hpe myit tsang nga ma ai majaw lai wa sai March (12) ya kawn hprawng koi yen nga sai re hpe mung chye lu ai.
KIA Dap Ba (9) ginra Hpakant ginra mayan hta ya aten gasat gala majan byin nga dingyang re hte masa gaw grai shaja hkat nga ai rai nna Myen hpyen dap Posts (5) lahta zing madu la lu sai re hpe mung chye lu ai.
Opmerkingen