Pajau Media
25.3.2025
Jinghpaw mung Ka Mai gira Lawa mare mayan Myen hpyen dap P.T.Ts pawng hpawm hpung ni hte KIA lapran gasat gala majan byin nna Myen hpyen dap kawn Ka Mai byuha kawng, Maran Kahtawng maga de hpyen n-gun jat dingyang re lam ginra masha ni tsun ai.
Myen hpyen dap gaw Lawa mare maga de shamu shamawt hpang wa ai gaw bat mi daram rai wa sai hte March 25 ya du hkra gasat gala majan matut manoi byin nga ai lam chye lu ai. Ginra masha ni gaw ni nawn ai shimlum dum ai shara hkan koi yen hkawm nga sai lam ginra masha langai tsun ai.
“N dai Lawa maga de gaw Myen hpyen dap hte Min Ze Thant masha ni hpyen n-gun jat shamu shamawt wa ai majaw gasat taw ai ya du hkra, matut manoi hpyen masa shaja hkat nga ai, Mung masha ni gaw shim dum ai de hprawng yen sai,” nga nna tsun ai.
Dai sha n-ga Myen hpyen dap gaw Ka Mai Myen hpyen dap byuha kawng maga de hpye n-gun jat nna Maran Kahtawng maga dung ai jep joi shara shagyit hpe pat kau nna hpyen shamu shamawt hkawm nga ai re lam Maran Kahtawng mare masha langai tsun ai.
“N dai laman Maran Kahtawng kaw nga ai shagyit hpe pat kau na Ka Mai byuha kawng maga de hpyen n-gun jat shamu shamawt nga ai'” nga nna tsun ai.
Lawa ginra de March 22 ya shana daw kaw nna Myen hpyen dap hte P.T.Ts pawng hpawm hpung ni sinat gap shangoi let shara la wa ai gaw ya aten du hkra re lam ginra masha ni tsun ai. Jinghpaw mung ginra mare kahtawng ni hkan Myen hpyen dap kawn Hpkant, Putao, Waimaw ginra maga de hpyen shamu shamawt nga dingyang re hpe mung chye lu ai.
Shiga- Hpring
Comments