Pajau Media
1.10.2024
Hpakant Seng Tawng ginra kata Myen hpyen dap hte KIA pawng hpawm hpyen hpung ni lapran gasat gala majan a majaw hprawng yen wa ai Mung masha 6,000 hkawt garum ningtum ra kadawn nga dingyang re lam chye lu ai.
September 29 ya shani kawn Lucky Men Hotel kaw shara jahkrat ai Myen hpyen dap hpe KIA pawng hpawm hpyen hpung ni htim gasat wa ai hpang gasat gala majan grau grau laja wa ai rai nna hpyen masa gaw ya aten du hkra shaja hkat nga ai masa re lam chye lu ai.
Hpakant Seng Tawng ginra kata gasat gala majan byin ai shata mi hkawt na wa sai hte hpyen masa shaja hkat dingyang rai nna ginra masha ni gaw kadai mung kadai shimlum dum ai shara de koi yen ai shata mi daram na wa sai hte ya aten malu masha tsi mawan, lang na arung rai kaw na hkawt yak hkak nga ai lam chye lu ai.
Hpyen Koi yen ai Mung masha n kau gaw Myitkyina ginra nawku makam masham hpung ni hkan shanu majun nga ai zawn nam de koi yen ai ni law nga ai lam chye lu ai. Hpakant ginra na Ja gumhpraw lu su ai hpyen yen mung masha ni gaw Myitkyina ginra kata na Hotel ni hkan shara la shanu nga ma ai raitim Ja gumhpraw yak hkak nga ai Mung masha ni gaw nga shara hte malu masha kaw na hkawt grai yak hkak ai majaw garum ningtum grai kadawn nga ai lam chye lu ai.
Comments