Pajau Media
28th February 2025
Jinghpaw mungdaw Hpakant ginra hta Myen hpyen hte KIA lahkawng maga shamu shamawt ai lam nga wa ai hte, nbungli kawn gap bun ai ni galaw nga ai majaw lung seng Company n kau mi lung seng htu jahkring da ai ni nga wa ai lam ginra masha ni tsun ai.
Lung seng htu masha langai tsun ai hta “Ya gaw company law malawng gaw pat da ai. Malawng maga gaw jahkring da ai re. Hpyen masa kalang bai shamu shamawt wa ai, nbungli kawn jahkring hkring wa gap ai majaw tsang na pat da ai re,” nga nna tsun ai re.
Ginra Masha ni tsun ai hta January shata praw ram kaw na Hpakant ginra hta Myen hpyen ni gaw hpyen masha shamu shamawt ai lam galaw nga nna, nbungli kawn jahkring hkring wa gap bun ai majaw Lung Seng htu ai company ni pat da ai re lam tsun ai.
Myen hpyen ni kawn lai wa sai February 27 ya shani jahpawt hkring 5 ram hta mung Hpakant Tatma Kung kawn uhpung lahkawng garan nna hpyen shamu shamawt ai hpang hkying 5 jan ram hta KIA pawng hpawng hpung ni hte Maw Tawng KIA shagyit hta majan byin ai re hte dai shara de Hpakant Tatma Kung kawn laknak kaba hte gap garum ai lam chye lu ai.
Dai sha n ga February 25 ya shani mung Thadar Oo nbungli dap kawn rawt wa ai Jet Fighters lahkawng hte gap bun ai ni mung nga wa lai wa sai lam chye lu ai.
Ya aten Hpakant ginra hta Myen hpyen hte KIA lahkawng maga hpyen shamu shamawt shaja hkat nga ai majaw hpyen masha mai laja wa nna nna, lai wa sai January shata kawn Hpakant ginra hta shimlum lam a matu gaduk nhkun ni htu shajin da shangun ai lam ginra masha ni tsun ai.
Shiga - Htu Seng
Comments