Pajau Media
25th September, 2024
Hpakant Seng Tawng ginra gasat gala majan a majaw ya aten Hpakant Nawku Jawng, Hpunggyi Jawng hte ni nawn ai jinghku nta hkan shanu nga ai ni hte Myitkyina maga de koi yen wa ai mung masha 6,000 jan gaw hkyak hkyak garum ningtum ra kadawn nga ai lam chye lu ai.
Hpyen koi yen mung masha ni tsun ai hta madung gaw malu masha hte hkyak hkyak lang na arung arai ni ra kadawn nga ai rai nna hpyen yen ladaw galu wa yang hkrum katut wa mai ai mayak masa hpe Myitkyina de koi yen wa ai Seng Tawng mare masha langai tsun ai.
“N dai kaw nga taw ai nga tim lam shagu grai naw yak hkak nga ai re, nawku hpung ni hku nna mung sa du gawan yu garum ai nga tim aten galu nga na matu gaw ra kadawn ai lam law law re, ya chyawm marai 50 daram sha naw re, bai gahtap du wa na ni mung nga ai” nga nna Dap Kawng CoC nawku hpung kawn woi awn ai hpyen koi yen dabang de koi yen wa ai mung masha tsun ai re.
Myitkyina de koi yen wa ai mung masha n kau gaw jinghku n ta hkan nga ai hte tinang a nawku hpung de wa nga shanu ai ni mung nga ai rai nna ya aten nga shara, tsi mawan, malu masha hte lu hka ni grai ra kadawn nga ai lam tsun ai re. Hpaknat de na koi yen ai mung masha ni gaw matut manoi du shang nga dingyang re hte Myitkyina-Hpakant hkrun lam yak hkak ai masa hpe mung matut tsun dan ai re.
“Hpakant kaw na Myitkyina de yu na matu ya gaw mawdaw pyi n nga ai daram re sai, hpa majaw nga yang hpyen yen wa ai aten mawdaw ni hpe gumhpraw law law jaw nna mawdaw ting shap kau ai, Mawdaw lu ai ni gaw mawdaw hte hprawng, cycle hte hprawng ai ni gaw hprawng, hpa n lu ai ni gaw yak sai gaw, ngut na KIA shagyit hte Sam Hkyeng P.T.Ts shagyit kaw mung grai jep ai, mawdaw hpe grau jep ai, lam dingyang cycle grai chyat hkra gashun gashe she re,” nga nna Hpakant kaw na yu wa ai salang langai tsun ai re.
Lai wa sai September 4 ya shani kaw nna Seng Tawng ginra de hpyen shamu shamawt ai lam matut manoi galaw wa ai hta September 7 ya shani gaw lahkawng maga gasat gala majan laja wa ai hta dai ni aten du hkra rai yang nhtoi 20 ya daram na wa sai re.
Majan ladaw nhtoi (20) ya laman hpyen yen mung masha 6,000 jan nga sai rai nna dai hpyen yen wa ai Mung mash ani gaw Seng Tawng mare sha n-ga Sabaw mare, Yu Ma mare, Mashi Kahtawng hkan na Mung masha ni re lam chye lu ai. Ya aten Seng Tawng ginra kata gasat gala majan laja nga dingyang re hte nbungli bawm wa jahkrat bun ai lam ni mung galaw ai re. Jinghpaw Mung kata KIA pawng hpawm hpung ni gasat gala majan baw ai March 7 ya kaw na rai yang Hpakant ginwang kata na Myen hpyen dap shara (19) daram hpe lu zing madu da sai hte Dap shara 9 daram naw ngam nga ai lam mung chye lu ai.
Comments