Pajau Media
7th February 2025
Mohnyin, Hopin ginra hta Sam Hkyeng P.T.Ts ni kawn ramma ni hpe atik anang hpyen lahkawn nga ai ten Hopin ginra KPDF (Hopin) kawn mung hpyen ma nnan hkap la shaga laika hpe February 4 ya shani hta shapraw mara da ai lam chye lu ai.
Dai shaga laika hta hpyen ma nna galaw na ni gaw asak 18 ning hpring ra nna hkamja let mayak manghkang hkamjat dang ra na, nga nna shadawn shadang 9 jahkrat let “Hopin KPDF kawn nang hpe ra nga ai,” ngu ai laika gasi hte rau KPDF(Hopin) de mai shang ai lam, kabu gara hkap tau la ai lam kada ai re.
Dai sha n ga mung shawa hte rawt malan a ntsa sadi dung ra ai lam, dap kaw na jahkrat da ai rip kawp Tara hte policy ni hpe hkan sa ra na hte lahta na jahkrat ya ai lit hte magam bungli ni hpe gunhpai la na lam, Tara tawt lai ai rai yang dap kawn jahkrat da ai mara hpe hkraktup hkamla ra na lam ni hpe mung sadi jaw madun da ai re.
Maga mi hta mung Mohnyin, Hopin ginra hta Sam Hkyeng P.T.Ts kawn hpyen ma nnan lahkawn ai lam laja lana galaw nga ai re hte ramma ni hpe atik anang rim la ai lam ni galaw nga ai re. Lai wa sai January shata 24 ya shani hta mung Hopin kaw na ramma 40 daram hpe lani mi hta sha rim la mat ai lam ni galaw nga ai re.
Sam Hkyeng P.T.Ts ni gaw hpyen ma 5,000 hpring hkra lahkawn na re lam chye lu ai hte rim la hkrum ai ramma ni hpe shata masum hpyen hpaji jaw ngut ai hpang lak nak jaw lang nna shagyit hkan nga shangun ai lam ginra masha ni tsun ai kawn chye lu ai.
Shiga - Zau
Comments