Pajau Media
24.9.2024
Jinghpaw Mung kata lai wa sai July praw laman marang ladu lai sawng ai majaw hkawm sa hkrun lam htenza mat ai shara law ai hta Hkawng Lang Hpu ginra hkawm sa hkrun lam mung ya aten du hkra nlu gram shi ai majaw shawng de lani mi hte mai du ai raitim bat hku lam bai hkawm sa ra sai nga nna Mung masha langai tsun ai.
June shata htum maga kaw nna Hkawng Lang Hpu hkawm sa hkrun lam shara law law gyi mat ai hpe ya du hkra n lu gram sharai shi ai majaw Mung masha ni hkawm sa grai yak hkak nga ai lam hpung gawan hkawm ai sara langai tsun ai.
“Hkawng Lang Hpu sa lam gaw grai yak hkak mat sai, lam gyi ai, bum gyi ai shara ni grai law ai. Mawdaw, Cycle ni n mai sa sai, ya gaw Putao kaw na Dahat mare du hkra sha cycle mai hkawm ai. San Lut Chet bum du hkra lahkawng ya yup ra ai. Hkawng Lang hpu du hkra nga yang bat mi ram lam hkawm ra ai” nga nna tsun ai re.
Lai wa sai ten hta gaw gunrai ni hpe Miwa maga de na dingyang shang ai daram re raitim Myen mungdan kata Covid ana zinli byin ai hpang Miwa jarit mayan hkrun lam ni pat kau nna gunrai n shang mat ai gaw ya aten du hkra re. Law malawng gaw Putao maga de na htaw la ai re. Hkrun lam mayak a majaw htaw shalai la na matu grai yak hkak mat ai masa hpe mung matut tsun dan ai.
“Putao kaw na gunrai htaw shalai la na matu grai yak hkak mat sai, Miwa maga na mung gunrai n shang mat sai re nga yang Hkawng Lang Hpu ginra gaw grai yak hkak sai.”
Putao kaw na Hkawng Lang Hpu gaw Deng latsa jan tsan ai re hte Hkawng Lang Hpu ginra de mawdaw, cycle hkrun lam mai hkawm sa ai gaw lai wa sai 2022 shaning kaw na rai sai re. Shaning shagu lanam ladaw marang htu sawng yang hkrun lam htenza lam grai law nga ai re, raitim dai ning gaw sawng dik re hte ya aten du hkra nlu gram sharai la shi ai lam chye lu ai.
Shiga - Mali Hku
Comentarios