Hkrang Hka Kaba Wa Ai Majaw Tari Mare Masha Ni Hka Hpyen Hkrum Ai Hte Garum Ningtum Ra Kadawn Nga

Pajau Media Channel

4th June, 2024

Hka hku mung ginra hta marang ladu lai htu sawng ai majaw lai wa sai May (30) ya shani Hkrang hka ladu lai kaba wa nna Tari mare na mung masha dum nta 10 jan hka hta yawng lawm mat nna ya aten garum ningtum grai ra kadawn nga ai lam chye lu ai.

Ya aten mare masha ni gaw nawku jawng hkan, naw ngam taw ai dum nta ni hkan sha jawm shanu nga ma ai hte lu ai hpe jawm sha rai nna nga taw ai lam chye lu ai. Hka hpyen hkrum ai mung masha ni ya aten malu masha, dinghku arai kaw na hkawt grai ra kadawn nga ma ai lam chye lu ai.

Lanam ladaw shang wa ai hte marang ladu lai htu sawng ai hta bum hka kalang ta kaba wa ai majaw mung masha dum nta ni hten hkrum nna hka hpyen hkrum ai mung masha ni shara shagu hta law wa ai hte ya aten garum ningtum lam ni grai ra kadawn nga ma ai lam chye lu ai.

Hka hku mung ginra hta n dai lang na daram hka kaba ai gaw shawng de n byin yu ai hte dai ning gaw sawng dik rai nna Tari mare hta shara shagu hkan na mung masha ni sa du nna Tari mare makau mayan hta ja htu sha nga ma ai gaw shaning kaba hku rai wa sai hte hka lam ni gashai mat ai masa ni a majaw marang htu ai hte bum hka ni kalang ta kaba wa ai hta ya na zawn byin wa ai re lam ginra masha ni tsun ai re.

Hka hku mung ginra gaw moi kaw nna matut mahkai phone line ni grai yak hkak ai sha n-ga lanam ladaw hta hkawm sa hkrun lam mung n hkrang ai ginra re. Dai ning na lanam ladaw shang wa ai hte hka kaba nna dum nta ni yawng lawm mat hkrum ai mabyin gaw Tari mare sha n-ga Chiphwi ginra hte Nmai hka makau mayan hkan shanu nga ai mung masha ni hta mung hkrum katut nga ai re.

May (29) ya jahpawt daw hta mung Chyiphwi ginra Myaw Maw Pa mare kaw bum hka mawru du shang wa nna mung masha dum n ta law law wa yawng lawm mat ai hte asak (50) grup yin re ai amyu shayi langai mung asak si sum mat ai lam nga sai re. Dai shani sha Chiphwi Saw law ginra hkawm sa hkrun lam ntsa na mahkrai langai mung hka kaba kaw lawm mat ai majaw hkawm sa hkawm wa lam grai yak hkak mat ai re hte ya aten hka hpyen hkrum ai mung masha ni garum ningtum grai ra kadawn nga ma ai re hpe mung chye lu ai.