Pajau Media
12.11.2024
Jinghpaw mung kata ya aten KIA pawng hpawm hpyen hpung ni hte myen hpyen dap lapran gasat gala majan laja nga ai hta Miwa jarit mayan Hkawng Lang Hpu P.T.Ts ni shara la nga ai Lang Se ginra hpe November 10 ya shani zing madu ai hta hprawng lawt mat ai P.T.Ts ni KIA maga de gahkyin wa ai lam nga ai lam chye lu ai.
Ya aten zing madu da lu sai Lang Se ginra hpe ginra jasan bungli matut manoi shang nga ai hte KIA pawng hpawm hpyen hpung ni htim gasat wa ai aten sinat ni kapaw kau da nna hprawng lawt mat ai Hkawng Lang Hpu P.T.Ts marai 10 lahta gaw lak nak jahkrat nna KIA maga de pawng hpawm wa ai lam chye lu ai. Matut nna mung naw shang wa na ni nga ai lam, dingyang na matut mahkai wa ai lam Hkagabu Peoples Force KPF kawn ginra shiga dap ni de tsun da ai kaw na chye lu ai.
Ginra sin P.T.Ts ni shara la nga ai Miwa jarit mayan shara law malawng hpe KIA pawng hpawm hpyen hpung ni htim gasat zing madu la lu sai re. Lai wa sai November 4 ya shani hta mung Chihpwi ginra kata na Gang Fang mare mayan shamu shamawt nga ai P.T.Ts hpyen la marai 100 grup yin mung laknak jahkrat gahkyin gumdin wa ai majaw Gang Fang hpe htim gasat n ra ai sha aloi sha zing la kau ai re lam mung chye lu ai.
Ginra sin P.T.Ts, BGF ni hpe lai wa sai October 25 ya shani ang ai KIO masat n htoi hta KIO ningbaw kaba a mungga hta ginra sin hpyen ni lak nak jahkrat nna gahkyin gumdin ai lam galaw na matu gahtap nna tsun sadi jaw ai hpang jarit mayan gasat gala majan hta ginra sin hpyen hpung ni lak nak jahkrat gahkyin gumdin wa ai re hpe mung chye lu ai. Ya aten jarit mayan shara law malawng zing la lu sai rai nna n lu zing shi ai gaw Kanpaiti ginra sha rai sai lam mung chye lu ai.
Comments