Pajau Media Channel
8th July, 2024
Dai ning na lanam ladaw shang ai hte Putao ginra hta marang matut manoi htu sawng ai majaw Hkawng Lang Hpu ginra hkawm sa hkrun lam gyi ru nna hten za ai majaw ginra masha ni hkawm sa hkawm wa grai yak hkak nga ai lam chye lu ai.
“Hkawng Lang Hpu kaw na Putao de du hkra matsat ( ya lagaw lam hkawm ai, mawdaw cycle tsep kawp n mai hkawm sai, marang matut manoi htu ai majaw n gam gyi nna hkrun lam ni yawng pat mat ai, mahkrai ni mung shara shagu hta hten nga ai, malu masha gunrai ni wa la na matu lagaw lam gun la na gaw n loi, lagaw ni mung grai hpye machyi wa ai hkrun lam grai yak hkak ai majaw” nga nna Hkawng Lang Hpu ginra masha tsun ai re.
Hkrun lam yak hkak ai hte gunrai manu ni ladu lai tsaw lung nga ai majaw Hkawng Lang Hpu ginra hkan na ma ni law malawng jawng n lu lung ai masa hte hkrum katut nga ai lam chye lu ai.
“Hkawng Lang Hpu maga na ma ni law malawng gaw dai ning jawng n lu lung ma ai, lai wa sai ten hta gaw Hkawng Lang Hpu maga hkan na ma ni gaw Putao kaw jawng wa lung ma ai, mawdaw lam pat ai hta gunrai manu ni tsaw ai majaw Boarder ni mung pat mat ai daram rai sai, hkrun lam mayak a majaw Hkawng Lang Hpu de hpaji sa sharin ya na jawng sara saranum ni mung n du ai, jawng mung pat da ra ai re”
Hkawng Lang Hpu ginra na mung masha ni gaw 2020 Covid ana zinli ladaw hpang kaw nna Miwa jarit ni yawng mung mat ai majaw malu masha gunrai ni hpe Putao kaw na sha madung htaw shalai la mat sai re. dai ning laman gaw du hkra ladaw a majaw byin pru wa ai shingra hpyen hkrum katut nna Hkawng Lang Hpu ginra nga mung masha ni shawoi shaning na hta grau yak hkak wa na mung masha ni myit tsang nga ma ai re hpe mung chye lu ai.
Shiga – Mali Hku
Comments