Hkawm sa hkrun lam pat ai majaw Myitkyina ginra hta Gun rai manu ni ladu lai tsaw mat ai majaw Mung masha ni hta myit tsang lam ni law nga ai re hte November (22) ya kaw nna hkawm sa hkrun lam bai hpaw ya sai re majaw Gunrai manu ni hkrat yawm na hpe mung masha ni myit mada nga ma ai re lam chye lu ai.
Myitkyina ginra hta n dai laman Ba hkri si,U Di, Shakau hpraw, Majap manu ni gaw Joi mi hta Mun mi jan, Mun lahkawng jan du hkra, ladu lai rawt wa ai hte Gunrai manu gaw rawt shang gumhpraw gaw n nga rai di grai yak hkak ai lam Myitkyina Shatapru Lawk kaw shanu nga ai Mung masha langai tsun ai hta “ Gunrai manu hte seng na gaw pyi n kam tsun sai, shakau hpraw hkying lahkawng na tawng masum sha lu ai, ganing n chye di mat sai, Pa hkri si nga yang pyi n mari sha mat sai, gunrai manu gaw rawt, shang gumhpraw gaw n nga rai nna myit ru ai ” lam tsun da ai re.
Shani shagu na lu sha gunrai manu ni gaw ladu lai tsaw lung wa ai majaw “Gat pyi gara hku n chye dut sha wa sai, manu ni gaw lani hte lani tsaw wa rai nna myit ru ai” Du kahtawng gat hta gunrai dut sha nga ai mung masha langai tsun da ai re. Jak sau manu ni mung dut ai shara pyi n nga hkra taw ai sha n-ga ya du hkra grai sharam nna she dut ya nga ai masa re hpe mung chye lu ai. Jinghpaw mung Sagaing jarit mayan hkrun lam ni bai hpaw sai raitim November 23 ya jahpawt daw du hkra gaw gunrai Lu sha manu ni yawm ai lam gaw n nga shi ai re majaw Gunrai lu sha manu ni yawm na hpe mung masha ni grai ra sharawng nga ma ai re.
Comentários