Pajau Media Channel
11st July, 2024
Myitkyina Muklum kata Hka kaba hkrum ai hpang shara n kau hkan hka hkyet sai raitim Hka htung hkan ngam ai nsan seng ai hka ni lang hkrup ai majaw Kan ana byin ai masha ni law wa ai lam chye lu ai.
Hka lim hkrum mat ai Myitkyina muklum lawk n kau hta byin nga ai mayak hpe mung masha langai tsun ai hta “Lawk kaw na masha ni lang na matu hka n lu ai majaw garai nlu shaw shi ai Hka htung kaw na hka hte shat shadu sha ai, dai hka hpe lang ai majaw kan mase ana ni byin ma ai, anhte gaw tinang na tinang hka chyup jak lahkawng hte mai byin ai hku Hka hkan chyup shaw ya ai, KBC kaw na ramma ni kawn mung Hka chyup jak hte hkan galaw ya nga ma ai” Myitkyina Mali Yang Lawk na mung masha langai tsun ai.
Lawk n kau hkan gaw hka hkyet sai raitim hkum pup hkum pa hte hkawm sa hkawm wa pyi yak ai madang re sha n-ga myi hprap wan ni atsawm n lu ai mayak ni amajaw Hka htung kaw na nsan seng ai hka ni hpe shaw jasan kau na matu yak hkak ai re hpe mung chye lu ai.
Hka lim hkrum ai hpang bai gaw gap lam ni hte seng nna lit nga ai Asuya hte shinggyim uhpung uhpawng (NGOs) hpung ni kaw nna mung hpa galaw ya ai lam n nga shi ai majaw tinang lawk tinang mai byin ai masa hta Jasan jaseng ai galaw nga ai re nga nna mung tsun ai.
Myitkyina ginra hta Hka kaba manghkang byin ai hpang makau grup yin nsan seng ai hte Hka nsan seng ai majaw kan ana byin ai lam, Hkum hkrang kaya, hpye ai ana ni byin taw nga ai re. Hka lim hkrum ai lawk n kau hkan hka hkyet sai raitim RamBo, Chyet Pawng chan, Ah le Kong , shatapru lawk shara n kau hkan hka atsawm n hkyet ai shara ni naw nga ai re, Hka hkyet ai bat mi daram na wa sai raitim ya aten du hkra Jasan jaseng ai lam hta ngut kre ai lam n nga shi ai re hpe mung chye lu ai.
Comments