Pajau Media Channel
8th July, 2024
Jinghpaw Mung Myitkyina muklum kata June 29 ya kaw nna lamu ga nem ai ginra mayan hka lim hkrum mat wa ai rai nna July praw 3 ya shani hka bai hkyet sai raitim ya aten du hkra hka lim mat ai mare lawk n kau jasan jaseng bungli shang nga dingyang re hpe mung chye lu ai.
Hka lim mat ai lawk ni hkan maza ni grai naw ngam ai hte lawan ladan jasan jaseng kau na matu myi hprap wan nlu ai sha n-ga jak sau manu rawt ai masa lam ni a majaw myitkyina ginra masha san seng lam galaw ai hta dut dang ai lam hkrum nga ma ai re hpe mung chye lu ai.
Myi hprap wan nlu ai majaw lu hka ni mung yak nga ai rai nna hka lim mat ai majaw shara shagu hkan na maza ni wa mahkawng ai majaw n bung n san seng ai sha n-ga makau grup yin n san seng ai majaw byin chye ai kan ana hte hkum kaya ai zawn re ai ana hte kaga machyi makaw ni hkrum sha law wa ai re hpe mung chye lu ai.
San seng lam hte seng nna garum ya nga ai shinggyim nau na garum hpung ni gaw nga ai raitim lu hka mayak nga ai sha n-ga ya aten hka tsinyam hkrum sha nga ai mung masha ni a matu malu masha, tsi mawan ni mung hkyak hkyak ra kadawn nga ai re lam chye lu ai.
Myitkyina muklum kata na San Pra Lawk, Edin Lawk, Dap Kawng hte Jan Mai Kawng lawk ni hta lai nna Ngam ai lawk law malawng gaw Hka Lim hkrum ai majaw sum machyi ai lam ni law law nga sai re.
Jinghpaw mung du hkra ladaw maram masam rung kawn n dau da ai hta July 8 ya shani kaw nna n htoi 13 ya laman Jinghpaw mung Manmaw ginwang, Mohnyin ginwang, Myitkyina ginwang hte putao ginwang ni hta marang matut manoi hkrat wa mai ai hte N mai hka, Mali hka kalang bai tung wa mai ai hte sadi maja ra ai lam n dau da ai re hpe mung chye lu ai.
Comments