Pajau Media Channel
26th August, 2024
Myitkyina-Mandalay lam kaba pat kau ai hpang gunrai ni hpe nbungli hku sha htaw shalai ai majaw gunrai manu ni ladu lai tsaw lung nga ai lam ginra masha ni tsun ai.
Lai wa sai August 17 ya shani kaw nna Myitkyina ginra de dingyang htaw shalai nga ai gunrai mawdaw ni pru shang lam n nga ai majaw Jinghpaw mung de htaw shalai nga ai gunrai ni hpe nbungli hku htaw shalai nga ai re nga nna tsun ai.
“Ya dut ya nga ai gunrai ni gaw hkrun lam hkrang ai aten htaw da ai ni re, n nan bai du shang wa ai lam n nga ai. Ba hkri si nga yang mung n nan n shang sai, ya n dai laman nbungli hte sha htaw la nga ai raitim manu grai hpu mat sai, bai dut na matu law law la jahting na matu pyi gashun gashe rai mari yang pyi n lu mat sai,” nga nna Myitkyina gat kaba kaw dut nga ai mung masha ni tsun ai.
Ya aten ba hkri si joi mi kaw mun lahkawng, shakau hpraw joi mi kaw mun lahkawng, shakau hkyeng joi mi kaw hkying matsat, yang-yi joi mi kaw hkying mali, sau joi mi kaw mun mi hkying sanit hte shanam joi mi kaw mun lahkawng hte dut nga ai re hpe mung chye lu ai.
Ginra kata na pru ai dum su, wa shan ni gaw joi mi kaw mun lahkawng jan nga ai raitim “Nga” joi mi kaw mun mali kaw na mun manga du hkra tsaw lung nga ai re. Myitkyina Muklum gat kaba kaw “Nga” dut ai Jan Ah Myaw hte Daw Kyi Aye seng ni kaw gaw “Nga” nlu mat ai majaw seng pat da ra ai re hte Mali hka Nga joi mi kaw mun mali hte dut nga ai lam tsun ai.
Dai sha n-ga majap katsing gga chyu kawk mi kaw hkying masum manga tsa, joi mi kaw mun manga, nta u joi mi kaw mun mali, Cp U joi mi kaw mun lahkawng du hkra tsaw lung nga ai re hpe mung chye lu ai.
Jinghpaw mung Putao dingdung daw ginra ni rai nga ai Putao ginra hta mung lai wa sai March shata kaw nna gasat gala majan a majaw Myitkyina-Sumpra Bum mawdaw lam pat mat ai hpang jak sau hte kaga gunrai ni hpe nbungli hku htaw shalai ra ai majaw gunrai manu ni grai tsaw nga ai re hpe mung chye lu ai.
Ya aten Jinghpaw mung kata shuk shanut nga ai mung masa a majaw Jinghpaw mung de htaw shalai nga ai gunrai mawdaw ni yawng hkring ra mat ai hte gunrai ni hpe nbungli hku htaw shalai nga ai raitim ya aten gunrai manu ni lani hte lani tsaw lung nga ai majaw mung masha ni myit ru myit tsang nga ai re hpe chye lu ai.
Comments