Pajau Media
12.10.2024
Hpakant Seng Tawng, Chihpwi ginra ni hpe KIA pawng hpawm hpung ni zing madu da sai raitim hpyen koi yen mung masha ni gaw ginra shimlam masa naw hkrit tsang ai majaw n gwi wa shi ai lam chye lu ai.
Zing madu da lu sai shara ni hpe ginra Jasan bungli matut manoi shang nga ai sha n-ga ginra masa mung simsa ai masa nre majaw Mung masha ni bai n htang wa nga na matu grai yak hkak ai masa naw re lam KIA maga na tsun shaga ahkang lu ai Dkb. Nhpang Naw Bu kawn mung ginra shiga dap ni de tsun da ai re.
Myen hpyen dap gaw tat sum kau ai shara ni hpe bai lu hkra laja lana htu shadut htim gasat nga ai sha n-ga bai nlu la yang jahten sharun kau na ngu ai masing kata KIA pawng hpawm hpung ni zing madu la lu sai shara ni hpe Nbungli bawm hkrup mara gap sharu bun ai majaw grai naw maja ra ai masa re.
Hpakant Seng Tawng, Chihpwi Saw Law ginra ni hpe mung KIA pawng hpawm Hpyen hpung ni kawn zing madu da lu sai raitim Myen hpyen dap kawn Hpyen nbungli bawm laja lana gap bun ai majaw Mung masha ni Muklum kata de n nga gwi ai re hpe mung chye lu ai.
Ya aten Chihpwi ginra masha ni gaw Chihpwi makau mayan mare kahtawng ni hte myitkyina ginra hkan hprawng yen wa ai ni mung law nga ai re, ginra masa loi shim lam nga yang she buga de wa na lam hpyen yen mung masha ni tsun ai kaw na chye lu ai. chihpwi Pang wa lam mayan de ya aten du hkra gasat gala majan laja nga ai sha n-ga ginra P.T.Ts hpung ni kawn mung hpyen lahkawn shamu shamawt ai lam grai galaw nga ai re hpe mung chye lu ai.
Commentaires