Pajau Media
10.10.024
Ya aten Jinghpaw mung ginra kata P.T.Ts hpung ni uphkang ginra ni hkan mung gasat gala majan laja nga ai re hte Putao ginra kata nga ai Putao P.T.Ts ningbaw Tang Gu Tang kawn mung tinang ginra shimlam a matu ginra kata P.T.Ts hpung ni pawng hpawm bungli galaw sa wa na lam hte seng nna October praw laman n dau laika shapraw ai lam ginra masha ni tsun ai kaw na chye lu ai.
N dau laika hta "ginra sin P.T.Ts hpung ni gaw tinang ginra shimlam a matu ra ahkyak yang ahkyak ai hku Mungdan asuya hte mung ta gindun nna bungli galaw nga ai hpung langai re, ya aten Putao ginwang Sumpra Bum, Chihpwi Saw Law ginra kata de gumshem ai hpyen hpung ni htim gasat ai majaw ginra kata gasat gala majan laja nga ai hte ginra mung masha ni grai yak hkak jam jau nga ai hpe mu mada ai. Tinang lit la da ai ginra kata shimlum lam gaw tinang lit la ra ai. Ya aten Lang Se ginra hpe lit la da ai P.T.Ts hpung ni kawn gina simsa lam ngang grin lu na matu lit la makawp maga sa wa ga, ra ahkyak ai hta hkan nna Putao ginra kata nga P.T.Ts hpung ni yawng pawng hpawm nna makawp maga sa wa ga" nga nna n dau da ai re hpe mung chye lu ai.
Putao ginra Nok Mung, Hkawng Lang Hpu, Lang Se girna ni hta Ginra sin hpyen hpung P.T.Ts hpung ni shara shamu shamawt nga ai re. Ya aten P.T.Ts hpung ni uphkang ai Lak San Uphkang ginra ni hkan gasat gala majan laja nga ai rai nna Putao ginra kata de mung majan byin wa mai ai majaw P.T.Ts hpung ni hku nna n-gun ka hkyin ai lam mung re hte hkyen lajin wa ai masa re lam ginra masha ni tsun nga ma ai re.
Ya aten Jinghpaw mung ginra kata majan laja nga dingyang re hte Putao, Sumpra Bum ginra mayan de Myen hpyen dap hte P.T.Ts pawng hpawm hpung ni n-gun jat hpyen shamu shamawt ai lam ni grai galaw nga ai majaw majan laja wa na masa nga ai lam ginra masha ni law malawng tsun maram nga ma ai re hpe mung chye lu ai.
Commentaires