Pajau Media
24.1.2025
Manmaw ginra kata gasat gala majan bai laja nga ai aten KIO ginjaw ginra Laiza de January 24 ya Hkying lahkawng jan aten daram hta Drone bawm lahkawng lang wa jahkrat ai lam ginra masha ni tsun ai re.
“ Mi ya sha lahkawng lang wa jahkrat ai majaw nahte pyi hprawng nga ga ai, kadai mung kadai shimlum ai de hprawng taw ai, langai gaw gara de kun n chye langai chyawm Hka Jang lawk kaw hkrat ai nga gaw na ai, masha hkala ai lam n nga ai, ya ngai pyi gat rai zing na hprawng hkyen nga ai” nga nna tsun ai re.
KIA pawng hpawm hpung ni kawn Manmaw ginra de lai wa sai December praw 4 kaw nna htim gasat wa ai re hte ya aten du hkra rai yang Shata mi jan wa sai re. KIA pawng hpawm hpung ni kawn Manmaw muklum shara law malawng hpe Shang madu da lu sai re hpe mung chye lu ai.
January 24 ya jahpawt daw kaw nna Manmaw ginra de kalang bai htu shadut htim gasat ai hta Ts.K.Hk 21 Dap a Ninggang Dap langai rai nga ai Tank Mawdaw Dap hpe zing madu ai lam shiga ni mawng wa ai hpang Ginjaw ginra de Drone bawm wa jahkrat ai re hpe mung chye lu ai.
Manmaw ginra gaw Myen hpye dap shara law ai sha n-ga n-gun mung law ai re majaw aten la nna htim gasat ra ai masa re lam mung chye lu ai. Myen hpyen dap gaw Jinghpaw mung ginra kata gasat gala majan sum machyi shagu KIO ginjaw ginra de Nbungli Drone bawm hte dingsa gasat ai lam ni dingyang ngu na daram galaw nga ai re hpe mung chye lu ai.
Ya aten Laiza ginra kata nga ai Mung masha ni gaw grai sadi maja let tinang shimlum dum ai shara ni de koi yen ai ni mung lawm ai lam ginra masha ni tsun ai re.
Shiga – Pyilan U
Comentários