Gasat Gala Majan Laja Wa Mai Ai Majaw Maina Hpyen Yen Camp Na Mung Masha Ni Buga De N Htang Wa Hkyen Ai Ni Law Wa

Pajau Media

31.1.2025

Ya aten Jinghpaw mung Maina ginra sha n-ga shara shagu ngu na daram de Myen hpyen dap kawn laja lana htu shadut htim gasat wa ai aten mung re hte Manmaw ngut yang Myitkyina de bai hpyen man yawng na lam shiga ni mawng nga ai majaw Maina hpyen yen dabang kaw shanu nga ai mung masha ni shim lam grai hkrit tsang nga ai lam tsun ai re.

“Majan mung shara shagu de grai sawng nga sai. N dai de mung grai hkrit ra na zawn nga wa ai. Dai majaw tinang buga de mai wa nga sai ni gaw arai ni htawt magang taw sai. N dai kaw nga taw yang mung grau yak wa na tai ai. N dai laman gaw yawng arai lahka kyin ai hku rai nga ,” nga nna hpyen yen mung masha langai tsun ai re.

Maina camp kaw shanu nga ai mung masha n kau gaw buga de wa mai ai ni wa magang sai hte n mai wa shi ai ni gaw tinang shimlum dum ai de arai ni htawk nga magang sai lam mung chye lu ai.

Ya aten Manmaw ginra, Jinghpaw mung hte Sagaing jarit Indaw ginra ni de gasat gala majan grai laja nga ai re hte majan hta Myen hpyen dap maga sum machyi ai lam law wa ai hte mung masha ni nga ai ginra de nbungli bawm jahkrat ai lam, lak nak kaba gap bun ai lam ni galaw nga ai majaw mung masha yawng gaw grai myit tsang nga ma ai re.

N dai laman Myitkyina ginra kata hta mung lak nak kaba gap bang ai n sen shani shagu ngu na daram na lu ai hte Myitkyina P.L.N shagyit kaw mung dap shara shimlam shagreng ai lam ni grau galaw wa ai sha n-ga Mile 8 ginra hta hkawm sa hkawm wa mawdaw ni hpe laja lana jep joi ai lam ni galaw nga ma ai lam ginra masha ni tsun ai kaw na chye lu ai.

Jinghpaw mung kata 2025 ning laman gasat gala majan gaw grau sawng wa mai ai re majaw mung masha ni gaw jau kawn shimlum lam hte seng nna hkyen shajin ai lam ni galaw ra ai lam mung masa hpyen masa maram masam nga ai ni tsun da ai re.

Shiga- Pyilan U