Pajau Media
14.10.2024
Laksan NDAK uphkang ginra Pangwa makau mayan de October praw kaw nna gasat gala majan laja nga ai gaw ya aten du hkra rai nna gasat gala majan a majaw Mung masha ni gaw Pangwa Muklum de koi yen shang wa ai masha tsa kaba rai wa sai lam ginra masha ni tsun ai kaw na chye lu ai.
Gasat gala majan a majaw Pangwa ginra de koi yen ai Mung masha gaw marai 500 hkawt du nga sai hte n kau gaw Waimaw maga de yu wa ai ni lawm ai raitim lam pat da ai majaw lam lapran kaw chyat nga ai sha n-ga P.T.Ts hpung ni kawn mung hpyen laja lana lahkawn nga dingyang re majaw hkawm sa hkawm wa lam ni mung grai yak nga ai re hpe mung chye lu ai.
Hpyen masa grai laja nga ai majaw Pangwa ginra kata bungli wa galaw ai ni mung n htang wa mung n mai mat, Pangwa ginra kata mung hkawm sa hkawm wa mung n mai galaw rai nna grai yak hkak ai lam ya na zawn tsun ai re.
“Gasat gala gaw Pangwa Muklum kaw n byin tim Pangwa makau mayan hkan byin ai re majaw gara de n mai sa ai, Pangwa myo de hkawm sa chyai pyi n mai mat sai, wa mayu tim n mai wa, lam mung yawng pat da ai re majaw grai yak sai ga re, anhte bungli galaw ai Miwa lauban ni mung tinang na bungli shara kaw sha nga na matu tsun da ai, gara hku byin wa na re mung n chye mat sai law,” nga nna Pajau Media de tsun wa ai re.
Pangwa ginra kata KIA pawng hpawm hpung ni hte Myen hpyen Dap, P.T.Ts hpung ni lapran gasat gala majan matut manoi laja nga dingyang re. Gasat gala majan lani hte lani laja wa ai majaw n kau gaw nam maling de koi yen ai ni lawm ai zawn, n kau gaw Miwa hkran de yen ai ni nga ai sha n-ga, n kau gaw Pangwa Muklum Tsi Rung, Nawku Jawng zawn re ai hkan shanu nga ai rai nna Pangwa de du shang wa ai gaw marai 500 hkawt du nga sai re.
Chihpwi, Saw Law muklum ni hpe KIA pawng hpawm hpung ni padang dip zing madu la lu sai hpang majan gaw Pangwa maga de man yawng nna matut manoi htu shadut gasat nga dingyang re hte Myen hpyen dap maga kawn nbungli hku laja lana htim gasat nga dingyang re hpe mung chye lu ai.
Comments