Pajau Media
19.11.2024
Mohnyin Indaw Gyi ginra kata November 12 daram kaw nna Sam Hkyeng P.T.Ts hte KPDF lapran gasat gala majan bai byin wa ai majaw mawdaw hkrun lam ni bai pat mat nna Sagaing jarit mayan Nam Si Awng shagyit kaw mawdaw 3,000 hkawt chyat nga ai lam hkrun lam hkawm masha ni tsun ai kaw na chye lu ai.
Ya aten Sagaing jarit mayan masa hpe hkrun lam hkawm masha langai tsun ai hta “Sau mawdaw, leng 12, 6 mawdaw kaba ni hte leng masum hte gunrai htaw ai ni, cycle ni yawng rai yang 3,000 hkawt daram nga ai, gau ngwi ngwi sha nawt nawt rai na sa ra ai, jan gaw ja, num hpu gaw mawng rai nna grai yak ai, shat seng mung n nga, rai nna grai yak ai,” nga nna tsun ai re.
Hkrun lam lapran hta malu masha kaw na hkawt grai yak hkak ai hte hka san bu mi hta hkying masum jaw ra nna Indaw hkrun lam lapran majan bai byin wa ai majaw sau mawdaw ni Mohnyin maga de n shang shangun ai majaw bai n htang gaw n rai re nna lam lapran kaw chyat nga ma ai lam chye lu ai.
Gasat gala majan bai byin wa nna hkrun lam ni pat da ai majaw ya aten Mohnyin ginra kata gunrai manu ni bai rawt hpang wa ai hte tsi mawan hte malu masha n kau ni taw wa ai mayak ni hkrum katut nga ma ai re. Majan a majaw hpyen koi yen ai Mung masha ni law jat wa ai re hte lak nak kaba a majaw Mung masha ni sum machyi ai lam hkrum sha nga ai hta Sam Hkyeng P.T.Ts kawn Sanun Kung mare kaw na Mung masha dum nta 5 hpe mung wan nat jahten kau ai lam ginra masha ni tsun ai.
“Dum nta manga wan nat jahten kau sai, la hpa n nga sai re, ya aten dum nta nlu mat ai Mung masha ni gaw Mohnyin kaw na amyu nta hkan nga na matu sa wa ai hpe Nam Mun mare kaw na Sam Hkyeng ni gaw n pru shangun ai, Indaw gyi de sha bai n htang wa ra ai re,” nga na mare masha ni tsun ai.
Indaw Gyi mare kaw ya aten lam pat da ai majaw malu masha tsi mawan ni htaw la ahkang pat da ai hta hpyen koi yen ai Mung masha ni gaw nga ai malu masha hpe Hpa galaw nna sha ra ai madang byin nga ai lam chye lu ai.
Shiga - Kachin Pyi Tar
Comments