Pajau Media Channel
22nd March, 2024
Myitkyina-Manmaw lam mayan hta lai wa sai March (7) ya kaw nna byin hpang wa ai gasat gala majan a majaw koi yen nga ai mung masha ni March (21) ya shani hta hkyak hkyak ra kadawn nga ai arung arai ni hpe htaw shalai la na ahkang lu ai majaw sa htaw la lu sai lam ginra masha ni tsun ai.
“Hpyen koi yen nga ai aten hkyak hkyak ra kadawn ai jai lang na rung rai ni hpe htaw shalai la na matu nawku hpung kaw nna lit nga salang ni kawn seng ang ai de tsun jahkrup nna galaw wa ai re” nga nna hpyen koi yen mung masha tsun ai.
Hpyen koi yen mung masha ni gaw hkum lawt daw sha hprawng wa ai re majaw jai lang na rung rai hpa nan nlu la wa ai re majaw lit nga ai nawku makam masham hpung woi sara ni kawn seng ang ai de tsun jahkrup nna lani mi aten lu ai hte sa htaw la lu ai re. Madung gaw Maina hpyen yen dabang, Nawng Hkying hpyen yen dabang shara shagu hkan na mung masha ni, Awng mye(1,2), Shwe Nyawng Pin, Katsu, Dabak Yang, hte Gara Yang mare hkan na ginra masha ni re lam chye lu ai.
Htu shadut majan hpang wa ai March (7) ya kaw nna hpang nna gasat gala majan a majaw Myitkyina-Manmaw lam mayan hkan na mung masha ni gaw majan lapran chyat rawng mat ai hpe nawku makam masham uhpung uhpawng ni hte PCG kawn woi awn ai kata bawngban jahkrup la nna shaw la lu ai hpang Waimaw ginra buga shara shagu de shanu nga ma ai re.
Hpyen koi yen mung masha (600) jan gaw Jam Ga buga kaw shanu nga ai re hte marai (700) jan gaw Nawng Hki buga kaw du nga ai re. Maina hpyen yen dabang kaw gaw mung masha hkying mi jan shanu nga ai re hpe mung chye lu ai.
Photo Credit
Comments