Pajau Media
22.10.2024
Ya aten Indaw Gyi ginra maga na koi yen wa ai hpyen yen Mung masha ni ya aten tsi mawan malu masha grai yak hkak nga ma ai hte garum na Wuhpung Wuhpng ni hte lu matut ai raitim sa garum na matu Myen hpyen dap kawn hkrun lam pat da ai majaw yak hkak nga ai lam chye lu ai.
“Malu masha garum ya ai hpung langai hte gaw lu matut ai raitim sa garum na matu hkrun lam kaw grai yak ai. Nam Mun bum kaw mung gate nga ai. Nam Mun mare num shang kaw mung, Nawku Jawng, laika sharin jawng ngut na Mai Nawng kaw mung P.T.Ts gate ni nga ai majaw lai hkawm na matu grai yak ai. Dai gate ni hpe lu lai tim pyi Lung Tung kaw Myen hpyen dap gate naw ngam shi ai. Indaw Gyi ginra de 5/ ni n mai sa ai. Nam Ma ginra masha ni, Jinghpaw kasha ni n mai sa ai, ramma ni mung n mai sa ai. Dai masa re majaw gara ma n mai hkawm sa na chyat rawng nga ra ai masa she re,” nga nna hpyen yen Mung masha ni tsun ai re.
Muklum de hpyen koi yen wa ai hpyen yen Mung masha ni hta malu masha yak hkak nga ai hte tinang ginra nre ai majaw tam lu tam sha shara n nga ai hta garum ningtum hpung ni hpe sha myit mada ra ai lam tsun ai re.
“Indaw Gyi kaw na Mohnyin de koi yen wa ai shata 3 na wa sai. Shawng na lang gaw Sezin kaw na Nam Mun de wa nga ai re. Nam Mun kaw na kalang bai koi yen hkawm ra ai. Lahkawng lang gahtap na koi yen ra ai re ga rai nga. Mohnyin kaw garum ningtum jaw ai nga gaw na ai tim kalang ma n lu ga shi ai. Tinang ginra nre majaw hpa mung n chye galaw mat. Dinghku masha gaw law, sha na gaw n nga rai hkoi shap, garum hpyi na sha shalai ai,” nga nna asak 45 ning re ai amyu shayi langai Pajau Media de tsun ai.
Ya aten Mung masha ni koi yen kau da ai mare kahtawng hkan na dum nta ni hkan Myen hpyen Dap P.T.Ts pawng hpawm hpung ni kam ai hku shalau nga ma ai hte Sam Hkyeng P.T.Ts ni kawn hpyen laja lana lahkawn nga ai re lam mung chye lu ai. “Nta hpe dai hku sha kabai da ai. Manu dan ai arai ni mung kam ai hku la kau ya. Ya aten hkau na mam ni wa galaw la ra ai raitim n gwi wa ai. Hpyen grai lahkawn ai nga majaw n gwi nga ai,” nga nna asak 35 ning re ai Nam Mun hpyen yen Mung masha langai tsun ai re.
Ya aten Indaw Gyi ginra kat na Nam Mun, Mai Nawng, Sanun Kung hte Intar mare hkan na Mung masha ni gaw KIA Uphkang ginra rai nga ai Nyawng Pin, Nat Mauk Kan hte He Pu mare ni de koi yen nga ai hta garum ningtum nlu du hkra Myen hpyen dap pat shingdang da ai majaw malu masha tsi mawan ni yak hkak nga ma ai lam chye lu ai.
Shiga – Kachyin Pyi Tar
Comentarios