Danai Shingbwi Yang Lam Ntsa Mare Kahtawng Ni Hkan P.T.Ts Ni Shara Jahkrat Nga Wa Ai Lam

Pajau Media

April 10, 2025

Jinghpaw mung Danai Shingbwi Yang lam ntsa na Laja Bum mare kaw Myen hpyen dap n pu na P.T.Ts pawng hpawm hpung ni dap shara jahkrat nga nna mare kata sinant n sen ngoi ai hte mare wan nat na ngu tsun jahkrit ai lam chye lu ai.

“P.T.Ts ni gaw mare tup re, n-gun latsa grup yin nga ai. Mare baw mare mai yawng shara la da ai. Nawku jawng, hpaji jawng yawng hkan shara la nna nga nga ma ai,” nga nna shawng lam shi sawk ni tsun ai.

Ginra masha ni gaw hprawng koi yen ai lam n nga shi ai raitim mare kata kaw hpyen la ni shara la nga ai majaw hkawm sa hkawm wa lam sha n-ga shimlam myit tsang ai lam, gasat gala majan laja na hpe mung myit tsang nga ma ai re.

Laja Bum mare kata P.T.Ts ni shara wa la ai gaw March htum wa maga kaw nna rai nna Laja Bum lai Dahkyet mare kaw mung dai zawn sha P.T.Ts ni shara la nga ai lam mung matut chye lu ai.

“Laja Bum ngu ai gaw Shingbwi Yang sa lam ntsa kaw re. Laja bum gaw Darung n du ai kaw re. Dai Darung mare lai na shawng du ai mare Dahkyet kaw P.T.Ts ni shara la nga ai,” nga nna matut tsun dan ai re.

Dai Dahkyet mare kaw mung P.T.Ts ni gaw nawku jawng, hpaji jawng ni, lup wa kawng hkan du hkra shara la nga ai lam chye lu ai. Myen hpyen dap gaw gasat gala gan jahkring ai lam n dau da tim ya aten du hkra nbungli, drone, lak nak kaba ni hte matut manoi gap gasat nga ai sha n-ga lagaw lam hpyen n-gun jat nga dingyang re hpe mung chye lu ai.

Shiga - 97