Pajau Media
7.1.2025
Hugawng ginra kata na Ja Ngai Maw kaw January praw (5) ya shana hkying 10:00 Pm aten hta hkawm sa hkawm wa madaw "Vigo Toyota" hpan gaw lam shut nna Ja nhkun de gau shang mat ai majaw masha marai (3) asak si sum mat ai lam chye lu ai.
Vigo Toyota mawdaw kaw marai (5) jawn lawm ai re hte dai mawdaw gaw Oi Law ja maw kawn Tsan Lun ja maw de n htang wa ai lam kaw lam shut nna Ja Ngai Maw na lauban La Min Htet a Ja n hkun de gau shang mat ai re lam chye lu ai.
Mawdaw kaw jawn lawm ai ni hta asak (18) ning re ai Shy Ja Seng Mai, Salang Marip Naw Lawn asak (40) hte Slg Hpauje Lawt Awng asak (36) ni gaw asak si sum mat ai rai nna Jan Tingba Ja Seng Bu hte Srn. Kumna Bawk Htoi yan gaw lawt pru wa ai re lam ginra masha langai tsun ai.
“Dai ginra gaw ja maw re majaw lam ni grai yu yak ai. Jahpawt lai ai lam hte shana daw lai ai lam pyi n bung mat sai. Lam koi grai galaw da ai, dingyang ja htu sha ai re majaw. Shana nga yang grau sai gaw. N sin gaw sin, Mahkup ni hte re majaw lam n mu mat sai gaw.”
Danai ginra kata Lapu Hka maw, Oi Law maw hte Tsan Lun maw ni nga nna ja htu sha ai lam hta mying gumhkawng ai ginra mung re. Ja maw ginra hta shana aten hkawm sa hkawm wa lam grai sadi maja ra ai hte Nshung ladaw Mahkup ni htat ai sha n-ga ja htu sha nga dingyang n hkun ni hpe atsawm n chye yu ai majaw byin ai masa re lam, shawng de n dai zawn re ai mabyin n byin yu ai lam ginra masha ni tsun ai hpe shi sawk Hugawng shiga jaw da ai re.
Shiga-Hugawng
Comentarios