Da Ginsup Dabang Ni Bai Hpaw Wa Ai Majaw Lagu Lagut Manghkang Grau Law Wa Na Hpe Mung Masha Ni Myit Tsang Nga Ai Lam

Pajau Media Channel

6th August, 2024

Myitkyina ginra kata Phone, Internet line ni yawng dawm kau ai hpang kaw nna pat tawn da ai Da ginsup dabang ni bai hpaw wa ai sha n-ga dabang n nan ni mung hpaw jat wa ai majaw ginra kata lagu lagut manghkang ni grau law wa na hpe mung masha ni myit tsang nga ma ai re.

Myitkyina Shatapru, Kachin Su, Chyara Bati, Ram Bu lawk ni kaw nga ai hkan nga ai Da Ginsup dabang ni hta Hpai, Nga gap game, U hte kaga ginsup hpan law law re hpe mung chye lu ai. Ya na zawn bai hpaw wa ai lam gaw ahkaw ahkang lu ai ni lapran myit hkrum lam la nna bai hpaw wa ai masa re lam mung chye lu ai.

Asuya lahta tsang uphkang salang ni n kau shara htawt sit galai gajai ai lam galaw ai 2023 shaning ka-ang daram kaw nna tara n shang Da ginsup dabang ni hpe asuya kawn pat kau ai re lam chye lu ai.

Myitkyina ginra kata kata Phone, Internet line ni dawm kau ai hpang kaw nna Da ginsup dabang law malawng bai hpaw nga sai sha n-ga n nan bai hpaw jat ai lam ni mung law wa ai re majaw ginra kata lagu lagut manghkang ni, asak ram ai ramma ni Da ginsup ai lam hta len mat nna htenza ai masha grau law wa na hpe mung masha ni myit tsang nga ma ai re.

Mungdan Uphkang masa galai mat ai 2021 kaw nna mungdan kata byin nga ai manghkang ni hpe lit la hparan ai Ngang Kang ai asuya n nga ai majaw nanghpam lu sha, lagu lagut, mya lu mya sha, masha sat manghkang law jat nga ai lapran ya na zawn Da ginsup dabang ni wang lu wang lang bai hpaw wa ai hpe mung masha ni n ra sharawng ai lam tsun ai re hpe mung chye lu ai.