Ya Aten Pang Wa Muklum Makau Mayan Hta Gasat Gala Majan Laja Nga Dingyang Rai Nga

Pajau Media

12.10.2024

Miwa mung jarit rai nga ai NDAK uphkang ginra Pang Wa Muklum makau mayan hta October 10 ya kaw nna KIA pawng hpawm hpung ni hte Myen hpyen dap hpung ni lapran gasat gala majan byin ai hta Myen hpyen dap maga na hpyen nbungli jai lang nna htim gasat nga ai hte ya aten du hkra majan laja nga dingyang re lam ginra masha ni kaw na chye lu ai.

Lai wa sai September 29 ya shani Chihpwi muklum hpe htim gasat zing madu la ai hpang, October praw lahkawng ya shani hta gaw Saw Law mare hpe htim gasat zing madu la lu ai hpang ya aten Chihpwi Pang Wa lapran Lau Pyi mare mayan hta gasat gala majan laja nga dingyang re. Majan gaw NDAK ginjaw ginra Pang Wa du hkra gasat wa ai re hpe mung chye lu ai.

Ya aten Chihpwi hte Pang Wa ginra ni hta matut manoi gasat nga ai rai nna Lau Pyi mare hte Pang Wa ginra masha ni gaw Shimlum ai shara hkan hprawng yen hkawm nga ai re hte law malawng gaw Pang Wa de koi yen hkawm ai lam mung chye lu ai.

Chihpwi, Saw Law ginra zing madu ngut ai hpang hpyen man gaw Pang Wa ginra de yawng nga ai re lam chye lu ai. Myen hpyen dap gaw madu da ai ginra ni tat sum ai lam n nga hkra nbungli hku mung laja lana shingla gasat nga ai rai nna ya aten NDAK laksan Uphkang ginra kata majan laja nga dingyang re hpe mung chye lu ai.