Putao Ginra Kata Myen Asuya Hpaji Jawng Ni Hta Jawng Mying Hkap La Hpang Nga Sai Raitim Kaga Ginra Hkan Na Jawng Ma Ni Jawng Mying Sa Bang Ai Lam N Nga

Pajau Media Channel

28th May, 2024

Putao ginra kata na hpaji jawng ni hta 2024-2025 hpaji ladaw a matu jawng ma mying jahpan hkap la hpang nga sai raitim Putao muklum grup yin nga ai jawng ma ni hta lai nna kaga ginra hkan na jawng ma ni jawng mying sa bang ai lam n nga ai re hpe chye lu ai.

“Jawng mying sa bang ai ni mung myo kata kaw na ni sha re sai. Sumtsan hkan na jawng ma ni mying sa bang ai lam n nga ai majaw jawng pyi galoi hpaw na re pyi n chye mat sai” nga nna Putao ginra jawng sara langai tsun ai re.

Ya aten na mung masa a majaw Putao ginra kata 2024-2025 hpaji ladaw ma ni a hpaji lam gaw grai myit tsang ra ai madang du nga sai re sha n-ga Putao ginra kata ya aten malu masha gunrai ni taw wa ai hte gunrai manu ni ladu lai tsaw lung wa ai majaw hkawm sa hkawm wa yak hkak nga ai sha n-ga jawng lang rung rai ni pyi nlu du mat sai re lam mung matut tsun ai re.

“Dai ning gaw Putao ginra kata na jawng ma ni a matu lai wa sai Covid byin ai aten na masa hta grau sawng mat sai. Jawng lang arung arai ni kaw na hkawt lu na n shadu sai. Lawu ga de na jawng sr/n ni mung ya du hkra n du wa ai."

Myitkyina-Putao hkrun lam ntsa byin ai gasat gala majan hpang hkrun lam ni yawng pat mat nna malu masha gunrai taw mat ai hta n-gu taw wa ai hte n-gu manu, sau manu ni ladu lai tsaw lung wa ai majaw Putao ginra kata hkawm sa hkawm wa mawdaw cycle hkrun lam ni mung yawng hkring ra mat ai re. N dai zawn re ai masa lam ni a majaw sumtsan kaw nna lahta tsang lung na jawng ma ni jawng de aten dep n lu du mat ai hte Putao ginra kata nga ai jawng ma ni daram sha jawng mying sa bang ai re lam mung chye lu ai.

Jinghpaw mung ginra kata hta byin nga ai majan masa gaw gau ngwi ngwi Putao ginra de du magang wa ai masa re hte Putao ginra kata byin nga ai mayak ni a majaw jawng ma nga shara Boarder ni hpe mung n lu hpaw mat ai madang byin nga ai re hpe mung chye lu ai. Putao Muklum hte tsan ai ginra hkan na jawng ma ni law malawng gaw lahta tsang hpe Putao muklum de wa lung ra ai raitim dai ning gaw mung masa mayak a majaw sumtsan hkan na jawng ma ni sa du jawng ap ai lam n nga ai re hpe mung chye lu ai.

Shiga- Mali Hku