Pajau Media
19.12.2024
Ya aten PutaO ginra kaw nga ai mare shagu hta Christmas hte shaning nnan poi na matu hkyen lajang taw nga ai aten raitim majan hpyen man gaw PutaO ginra maga de gayin wa ai masa ni nga taw ai majaw Mung masha ni myit tsang nga ai lam chye lu ai.
December shata bat masum ngu na bat hta gaw ginra shara shagu hta Christmas poi galaw na matu hkyen lajang taw nga ai raitim ginra kata hpyen shamu shamawt lam ni nga ai majaw majan laja wa na hpe myit tsang ai lam Putao ginra masha tsun ai re.
"Putao- Myitkyina lam Sum Pyi Yang mare hta majan byin hpang na lam shiga ni pru wa taw nga ai, ya anhte Christmas poi galaw na matu hkyen taw nga ai, dai shiga a majaw Myitkyina maga de hkawm ai ni mung nnga mat sai, majan byin yang gaw lam ma pat na re majaw mas poi laman majan nbyin na she myit mada ai," nga nna Hpung Sara langai tsun ai.
Dai sha n ga, ya hte laman PutaO-Myitkyina lam kaw na Lung Sha Yang mare hta dung ai Myen hpyen hte P.T.Ts pawng hpawng dap ni mung Lung Sha Yang hte Tan Ja mare kaw na mare masha ni hpe mare shinggan hte nam de le na ahkang n jaw ai lam ginra masha langai mi tsun ai kaw na chye lu ai.
Myitkyina-Putao lam lapran kaw na mare masha ni hte Sumpra Bum muklum kaw na mare masha ni hpe majan byin wa yang nbungli hte bawm jahkrat na hkrit ai majaw simlum ai shara de hprawng yen na shara tau hkrau nna galaw da shangun ai lam nga ai hpe chye ai.
Shiga – Mali HKu
留言