Chiphwi Ginra Kata Na Hka Hpyen Hkrum Ai Mungshawa Ni Garum Ningtum Ra Kadawn Nga

Pajau Media Channel

14th June, 2024

Hka mawru a majaw nta yawng hten za lawm mat ai Myawmaw Pa mare hte Zang Nawng mare masha ni gaw ya yang malu masha, nga shara hte jai lang arung arai ni hkyak hkyak ra kadawn nga ai lam ginra masha ni tsun dan ai kaw na chye lu ai.

May 29 ya jahpawt jau aten hta marang kaba htu wa nna bum hka kaba wa ai majaw dai mare masha ni a dum nta 10 jan hka kaba ai hta yawng lawm mat wa ai sha n-ga kaga dum nta 30 daram mung hten za hkrum mat ai re.

Dai zawn hka hpyen mawru hta ginra masha ni a gunrai ni, malu masha ni, mamdum ni hte kaga ra ahkyak ai bu hpun palawng ni ma hkra hka mawru hta yawng lawm mat ai re majaw ya ten garum ningtum grai ra kadawn nga ai re hpe chye lu ai.

Hka hpyen hkrum ai mung shawa ni gaw ya aten hta shim ai shara hta n-ta ginsum gap rawng nga ai rai nna nkau mi gaw jinghku jingyu hte nawku jawng ginra shara ni hkan shingbyi shanu nga ai nhtawm malu masha hte kaga arung arai law law mung ra kadawn nga ai re.

Hka hpyen hkrum ai mung shawa ni a matu dangdi dangdep ai daram garum shang lawm ya na matu mung dai ginra na mung shawa ni myit mada nga ma ai re.

Bum hka kaba wa ai majaw hka hpyen hkrum nga ai Myawmaw Pa mare hta n-ta htinggaw 80 daram, mung shawa 300 daram shanu nga ai rai nna dai hka hpyen a majaw Zang Nawng mare na dum n-ta 9 mung hten za mat ai re lam ginra masha ni kaw na chye lu ai.