Pajau Media
11.7.2024
Chihpwi Muklum htim gasat zing madu ai hpang htawt sit wa ai Myen asuya Hkam Ja Dap magam gun ni hte Hpaji Dap magam gun ni gaw shata shabrai n lu ai shata lahkawng rai wa sai lam Chihpwi kaw nna Myitkyina de htawt sit wa ai Hpaji Dap magam gun kaw na chye lu ai.
Dingyang jaw nga ai shata shabrai hpe September hte October shata na matu ya du hkra n jaw shi ai lam Chyihpwi Muklum kaw nna asuya Hpaji Dap magam gun langai Pajau Media de tsun ai re. “Myitkyina kaw bungli shang taw ai shata mi hpring sai, shata shabrai gaw n htuk ya shi ai, shawng na shata na ma, Chihpwi kaw na langai hkrai hprawng pru wa ai re majaw arai ni mung yawng tawn kau da, ya gaw gunrai manu ni mung rawt ai hte malu masha kaw na hkawt grai yak wa ai.”
Chihpwi Muklum hpe KIA pawng hpawm hpung ni lai wa sai September 29 ya shani zing madu la ai hpang Hkamja lam, Hpaji lam magam gun ni gaw October 30 ya shani Myitkyina asuya rung ni de ginrun magam gun hku nna shara masat jahkrat da ai re lam chye lu ai.
Htawt sit wa ai magam gun ni gaw gunrai manu gaw rawt, gumhpraw gaw n lu rai nna grai yak nga ai lam matut tsun da ai re. “Lani mi gat sa yang yawm htum Mun Lahkawng Masum gaw ma ai, kalang marang gaw hkoi shap sha ra ai, N-gu buk mi kaw Sen Mi jan, U di hkum mi kaw 800 the 900 lapran rai taw ai kaw grai yak wa ai, jinghku ni kaw sha hkan sha ra taw ai masa re,” nga nna tsun ai.
Shata shabrai n lu ai raitim shani shagu bungli gaw dingyang sa ra nga ai hte asuya magam gun langai a shata shabrai Sen Masum jan hte ya aten na gunrai manu ni hku rai yang n law ai sha n-ga man man mung bai n jaw ai majaw grau yak nga ai hta lit nga ai asuya kawn lawan ai hku hparan ya na matu mung hpyi shawn nga ma ai re.
“Chihpwi gaw KIO uphkang ginra rai mat sai, asuya rung yawng mung KIO shara rai mat sai. Jawng ni mung KIO jawng rai taw sai, dai kaw galaw na Jawng sr/srn ni hpe shata shabrai Sen Lahkawng jan hte N-gu buk mi jaw na lam shiga ni mawng ai majaw hprawng yen wa ai sr/srn ni hpe dai maga de sa na KIO asuya magam gun n kam tai shangun ai majaw shata shabrai da sang n htuk jaw ai rai na re nga na tsun taw ma ai,” nga nna mung tsun maram da ai re.
Jinghpaw mung Chihpwi Muklum hpe KIA pawng hpawm hpung ni September 29 ya shani zing madu la ai hpang ginra jasan ai lam ni matut manoi galaw nna asuya rung ni yawng hpe October praw laman yawng wang pat kau ai hte KIO Uphkang Sai Ru galaw hpang nga sai lam chye lu ai.
Comentários