Pajau Media
3.10.2024
Ya aten Chihpwi Muklum hpe KIA kawn zing madu la lu sai hpang Myen Asuya Rung hte seng ai shara yawng hpe pat shingdang kau sai rai nna KIO uphkang hkrang hkrak galaw hpang nga sai lam Chihpwi ginra masha tsun ai.
“KIA zing ai hte jahkring sha laman grai lawan ai hku Asuya Rung ni yawng hpe pat shingdang kau sai, KIO uphkang Policy kalang ta galai kau sai, ya gaw kadai mung n nga sai, Asuya Hpaji Jawng ni hpe KIO jawng hku galai kau sai. Dai kaw na jawng sara/num ni mung yawng htawt mat ma sai, naw ngam taw ai ni mung nga ai,” nga nna Chihpwi Asuya Jawng magam gun langai tsun ai re.
Chihpwi ginra hpe lai wa sai September 29 ya shani kawn KIA pawng hpawm hpung ni hte myen hpyen dap lapran majan laja lana byin ai rai nna Balik Dap hte hpyen dap shara yawng hpe KIA kawn zing madu la lu sai re. October praw 1 kaw nna Myen Asuya Rung shara ni yawng gaw KIO uphkang hkrang npu de du mat sai re.
Chihpwi ginra kata na Myen hpyen dap shara ni hpe zing madu la lu sai raiitm Myen hpyen dap gaw nbungli hte shani shagu wa gap bun ai majaw ginra masha ni gaw shimlum dum ai shara de gan koi yen hkawm nga ai re hpe mung chye lu ai.
Chihpwi zing madu ai hpang matut manoi htim gasat ai hta October praw 2 ya shani hta gaw Dap Ba (7) kata na masat 46 dap ni kawn Saw Law ginra hte makau mayan hkan na P.T.Ts Dap shara ni hpe mung zing madu la lu sai lam chye lu ai.
September 29 kaw nna KIA pawng hpawm hpung ni gaw Chihpwi ginra de htu shadut htim gasat hpang wa ai mali ya laman Chihpwi, Sawlaw hte Shangaw kaw dap jung ai Myen hpyen dap shara ni hpe tsep kawp zing madu la lu sai re.
Comments