Pajau Media
2.10.2024
Myen hpyen dap gaw rawt malan hpung ni zing madu da lu sai ginra ni de hpyen nbungli hte bawm wa jahkrat dingsa gasat ai lam dingyang galaw nga ai hta ya aten zing madu da lu sai Chihpwi ginra de mung shana shagu nbungli bawm wa jahkrat ai majaw Mung masha ni hkrit tsang nna hprawng yen dingyang rai nga ai lam shawng lam shiga kaw na chye lu ai.
September 29 ya shani chihpwi ginra hpe KIA pawng hpawm hpung ni htim gasat zing madu la lu sai hte Sawlaw ginra de matut manoi htim gasat wa ai hta Oct praw 2 ya jahpawt daw hkying 7:00 AM aten daram hta zing madu la lu sai lam chye lu ai.
Zing madu la lu sai ginra masa hpe shawng lam shi sawk tsun ai hta “Sawlaw hpe gaw dai hpawt zing madu la lu sai, Chihpwi hkan na Mung masha ni gaw hprawng yu wa tik tik re, shana yup tung hkan Myen ni Jet nbungli grai wa gap ai majaw tsang ra ai, kadai n gwi nga ai, Chihpwi makau hkan na Zang Nau, Shangaw the Man Dawng hkan na ni gaw nga ma ai,” nga nna tsun ai.
Gasat gala majan laman lak nak kaba hte nbungli bawm a majaw mung masha si hkala hkrum ai lam nga ai raitim marai kade hkala ai hte kadai ni re ngu ai mying hkum zup n lu chye ai re. Ya aten Chihpwi ginra hpe KIA pawng hpawm hpung ni zing madu la ai hpang Uphkang Rung, Balik Dap, Tsi Rung hte Myen Asuya Rung yawng hpe pat shingdang da sai re hpe mung chye lu ai.
Hpyen yen mung masha n kau gaw nam de koi yen ai ni nga ai zawn, Myitkyina de hprawng yen ai ni mung law nga ai re hpe mung chye lu ai. Chihpwi muklum gaw myitkyina kaw nna deng 88 tsan ai shara kaw nga ai rai nna 2022 Asuya Uphkang Rung kawn tang madun ai jahpan hku nga yang Mung masha marai 22,092 shanu nga ai muklum re hpe mung chye lu ai.
Comments