Pajau Media
6 November,2024
Myen Hpyen Dap npu na jarit Sin hpyen hpung ni BGF, P.T.Ts hpung ni lak nak jahkrat nna masa langai hta hkawm na matu Wunpawng Mungdan Shanglawt Asuya Ningbaw Kaba Du Daju Jum Nban la kawn gahtap nna tsun sadi jaw ai hpang BGF, P.T.Ts hpung n kau Laknak jahkrat pawng hpawm wa ai lam ni nga ai re hpe chye lu ai.
KIA pawng hpawm hpyen hpung ni gaw Lai wa sai September shata htum wa maga kaw nna Miwa jarit rai nga ai NDAK laksan Uphkang ginra de matut manoi htu shadut htim gasat nga ai hta Pang Wa Muklum hte rau kaga ahkyak ai shara law law hpe zing madu la lu sai re.
November praw 2 ya shani hta gaw Hpimaw mare hpe zing madu la ai lam, matut nna BGF,P.T.Ts ni nga ai Miwa jarit Gangfang mare hpe November 4 ya shana hta zing madu la ai lam chye lu ai.
Gangfang mare maga de KIA pawng hpawm ni htim gasat shang wa ai aten BGF,P.T.Ts marai (100) grup yin gaw laknak jahkrat nna KIA pawng hpawm hpung ni hpang de gahkyin wa ai re majaw Gangfang mare hpe gasat gala n nga ai sha zing madu la lu ai lam chye lu ai.
KIA pawng hpawm hpyen hpung ni kawn Miwa jarit mayan jarit sin hpyen hpung ni a ahkyak ai dap shara kaba ni yawng hpe zing madu da lu sai re. Ganghkau Facebook ntsa hkan mu lu ai hta Gangfang Mare de du shang wa ai KIA pawng hpawm hpung ni hpe mung mare masha ni grai hkap tau ai Sumla ni grai mawng pru wa ai re.
Ya aten miwa jarit mayan hpyen masa shaja hkat nga ai majaw miwa maga kawn jarit lam yawng pat kau ai majaw miwa jarit mayan shanu nga ai Mung masha ni grai yak hkak nga ai lam mung chye lu ai.
Kommentare