Pajau Media
17.10.2024
Jinghpaw Mung Myitkyina Masat 2 Balik dap ginra mayan na Internet Seng Hpaw sha nga ai seng madu ni hpe Balik dap kawn October 16 ya shani jahpawt daw 10:00 Am daram hta shaga la nna zuphpawng galaw ai lam chye lu ai.
Zuphpawng shaga ai hta Myitkyina Muklum kata Internet seng hpaw sha ai masha grai law wa sai majaw shakap da ai n dau laika ni hpe dawm kau na lam, hpa baw Online lang ai ngu ai ni hpe san jep ai lam chye lu ai. Masat 2 Balik rung wang kata Internet mai lang hkra pawng hpawm nna galaw ya na matu tsun wa ai re hpe mung chye lu ai.
“Balik Rung wang kaw Internet mai lang hkra wifi lajang ya na matu tsun ai re, kaga rim na lam, gumhpraw hpyi ai lam chyawm n nga ai, Internet mai lang ai lam shakap da ai laika pa n kau hpe dawm kau shangun ai, gara line ni lang ai rai nga san ma ai, K-net lang ai i, IP star lang ai i, Starlink lang ai i? nga na san ai,” lam zuphpawng shaga hkrum ai mung masha langai tsun ai re.
Internet seng hpaw da ai seng madu ni pawng hpawm nna Balik dap kaw Internet lu hkra galaw ya mai ai raitim n nan sha hpaw hpang wa ai seng ni gaw internet lu ai lam laika n shakap yang kadai n chye ai, n sa lang wa ai majaw Balik rung kawn tsun ai hku galaw na matu mayak nga ai nga nna tsun ai re.
Raitim Myitkyina Muklum ka-ang Masat (1) Balik Dap hte Palana Masat (3)Balik dap ni gaw internet seng hpaw ai lam hte seng nna hpa tsun ai lam n nga shi ai re hpe mung chye lu ai. Lai wa sai July 21 kaw nna Myitkyina Muklum sha n-ga Jinghpaw Mung ginra law malawng hta MPT,Oredoo, Mytel, Atom phone line ni yawng hpe dawm kau ai re. Dai aten kaw nna Myitkyina ginra kata IP star hte Starlink internet seng hpaw ai lam ni grai law wa ai re hpe mung chye lu ai.
Ip Star, Starlink line sha n-ga n dai laman K-net wifi hpe shata mi Sen 7 kaw nna sen 10, 15 du hkra jaw nna mari lang let hpaw sha nga ai hta hkying hkum mi kaw lap 5,000 du hkra manu shayawm nna jai lang mai nga sai lam chye lu ai.
Kommentare