August Shata Laman Myen Hpyen Dap Hte Rawt Malan Hpung Ni Lapran Gasat Gala Majan Hkumhpawng

Pajau Media

September 19, 2024

Jinghpaw Mung kata 2024 August shata laman Myen hpyen dap hte KIA pawng hpawm hpung ni lapran gasat gala majan 35 lang byin ai lam chye lu ai.

August shata laman Myen Mungdan kata nga rawt malan hpung ni a ginra ni hta gaw gasat gala majan 106 lang byin ai lam nga nna, Myen mungdan ting madang hku nga yang KIA/KIO, AA/ ULA ginra ni gaw gasat gala majan byin law dik ai shara ni re hpe mung chye lu ai.

Gasat gala majan a majaw Jinghpaw Mung kaw August shata laman Mung masha hkala hkrum ai lam marai (4) a lahta nga ai rai nna Myen mung madang hku rai yang asak si sum ai Mung masha (259) nga ai re hte hkala hkrum ai Mung masha gaw 223 du hkra nga ai lam tsun da ai re.

Myen hpyen dap hte Mungdan kata nga rawt malan hpung ni byin ai gasat gala majan a majaw August shata mi laman hpyen koi yen hkawm ra mat ai Mung masha gaw Jinghpaw mung kata marai 500, Sagaing ginra kata marai 52,200, Rakhine Mung ginra hta marai 10,000, Bago ginra kata marai 5,000, Thaninthari ginra hta 4,400, Kayin Mung ginra hta 2,000 hte Sam Mung ginra hta marai 5,000 hkawt nga ai lam BNI-Myanmar Peace Monitor kawn tang madun da ai re.