Pajau Media Channel
31st August, 2024
Jinghpaw mung kata gasat gala majan a majaw hpyen koi yen ai mung masha lani hte lani law wa ai hte n dai hpang daw de hpyen koi yen dabang hkan Asak kaji ai Ma ni nanghpam lu sha ai masha law wa ai lam hpyen koi yen mung masha ni kaw na chye lu ai.
Waimaw-Laiza lam mayan byin ai gasat gala majan hpang dai ginra mayan mare kahtawng hkan na mung masha ni gaw Labang Kahtawng, Nawng Hkying ginra de koi yen hkawm nga ai hta dai ginra de ka-ni nanghpam lu sha masha ni law wa ai lam, dai kaw asak shi jan ning re ai hpyen yen dabang hkan na law nga ai lam hpyen yen mung masha langai tsun ai.
“Mare kata ka-ni dut sha ai lam ni grai nga wa ai, dai kaw she bai lu sha ai gaw mare masha ni hta hpyen yen dabang hkan na Ma ni grau law nga ai, lu sha ai Ma ni gaw asak shi jan ning re ai Ma ni grau law nga ai” nga nna tsun ai.
Ya na zawn asak kaji ma ni ka-ni lu sha ai lam law wa ai gaw hpaji sharin ra ai aten hta kanu kawa ni mung atsawm nlu hkan galaw ya ai, hpyen yen ladaw hta yak hkak ai lam law law lapran jawng hpe tang du hkra nlu sharin mat ai majaw re ngu mu mada ai lam matut tsun ai.
“Ya Anhte gaw kanu kawa ni mung kashu kasha ni hpe atsawm n lu dek mat sai. Kashu kasha ni mung jawng lung ai raitim ya na mung masa hte jawng mung hpaw dat pat dat, hpaji lam mung grai hpang hkrat wa ai. N kau gaw myit daw ai, jawng she bai lung taw tim myit maju jung ai lam n nga wam wam dam dam re ai masa a majaw re,” ngu mu mada ai lam tsun ai re.
Ginra Pat Jasan hpung ni kawn gaw ginra kata PJS bungli ni hpe dingyang shamu shamawt galaw nga ai hta lu rim la ai ni gaw hpyen yen dabang hkan na Ma ni grau law wa ai re hpe mung chye lu ai. Jinghpaw mung ginra kata mung masa a majaw galaw lu galaw sha n mai, shang gumhpraw n nga ai re masa hta ka-ni nanghpam dut sha masha law wa ai majaw re nga nna hpyen yen mung masha ni tsun ai kaw na chye lu ai.
Comments