Pajau Media Channel
13rd May, 2024
Putao muklum Dukdang Lawk (2) kaw na asak (15) ning re ai mahkawn kasha hpe mazut roi rip sat kau ai wa hpe lu rim sai hte manghkang teng man tara rap ra ai hku ja ja ahkyak la ai lam, si ari je yang dawdan ya na matu May (13) ya shani Putao ginra masha (5,000) hkawt shang lawm nna moi mang htaw ai mawdaw hpawng hta hkawm let n-gun madun hpyi shawn ai lam chye lu ai.
Shy. Gumring Du Naw hpe mazut roi rip sat kau ai wa gaw asak (24) ning re ai Ko Kyaw Thu Ra nga ai wa re hte shi gaw Mandalay kaw nna Putao ginra de hpri rai dut ai gunrai seng kaw bungli wa galaw ai wa re hte May (12) ya shani rim kau lu sai re lam chye lu ai. Mazut roi rip manghkang shabyin ai wa gaw Ph mung gashun la mat ai re hte dai phone hpe seng kaw wa dut ai kaw na manghkang shabyin ai la wa hpe sagawn la lu ai re lam mung chye lu ai.
Asak si sum mat ai asak (15) ning re ai shayi sha gaw May (10) ya shani kanu hte rau chyinghkrang sau wa rin ai kaw nna dum nta de kanu n lawm ai sha shi hkrai wa ai lam kaw mazut roi rip sat hkrum ai rai nna shi wa ai lam gaw masha nau n lai ai lam re hte lam lapran kaw manghkang byin ai re lam chye lu ai.
“Shy. Gumring Du Naw gaw manghkang byin ai shana daw hta sau wa mari na matu sa ai hpang yup tung tung wa tim nta de n du wa ai majaw kanu kawa ni hte makau grup yin ni kawn hkan tam ai hta ya na zawn mazut roi rip sat da ai hpe mu ai re” nga nna tsun ai re.
Ya na zawn mazut roi rip zing ri sat hkrum ai manghkang a ntsa maigan du Rawang amyu sha Uhpung Uhpawng hpung (5) kawn mung n dau laika shapraw da ai re. N dau laika hta Putao ginra hta shawng ningnan lang byin ai hkrit tsang hpa mazut roi rip manghkang re hte ladu lai sawng masha sat manghkang re, Rawang amyu sha ni a shari hpe roi nra di ai lam mung re sha n-ga ginra kata nga amyu sha ni a shawng lam shim lum lam n nga ai ngu hpe htawng madun nga ai lam mung re.
Manghkang shabyin ai wa hpe lit nga ai ni kawn ja ja ahkyak la na matu hpyi shawn ai lam, asak nhpring mazut roi rip manghkang hpe mungdan shara shagu kaw nga ai Rawang amyu sha ni yawng mung ja ja ninghkap nra sharawng ai lam n dau laika shapraw da ai re hpe mung chye lu ai.
Shiga - Mali Hku
Commentaires