Pajau Media
28.11.2024
Laiza Amyu Shayi Hpung Ginjaw kaw nna woi awn galaw ai hte amyu shani a ntsa mazut roi rip ninghkap masat nhtoi lamang hpe November shata 28 ya jahpawt galaw ai lam chye lu ai.
Amyu shayi ni a ntsa mazut roi rip ai lam ninghkap n htoi hte November 30 ya shani ang ai Sinpraw Dingda Asia ginra amyu shayi masat n htoi lamang hpe madi shadaw ai hku nna ndau laika pa gam ai lam, Sumpan ahpraw campaign ni hpe Laiza Muklum ginjaw amyu shayi hpung ginjaw kaw nna woi awn ai hte Laiza Muklum kata ningmu jahpaw hkaw tsun ai lam, lai wa lai sa ni hpe laika pa garan ai lam galaw ai re hpe mung chye lu ai.
N dai lamang hta Laiza Muklum kata nga ai amyu shayi 100 jan shang lawm ai hte ndai lamang hpe shawoi shaning ni hkan mung galaw ai re lam chye lu ai. Mungkan mungdan shara shagu hkan mung November 25 ya kaw nna December 16 ya shani du hkra hpe amyu shayi ni a ntsa mazut roi rip ai lam hkoi mat hkra ningmu jahpaw hkaw tsun ai lamang ni galaw nga ma ai re hpe mung chye lu ai.
Mungkan mungdan kata nga ai amyu shayi 3 kaw nna marai langai gaw mazut roi rip manghkang hkrum sha ai re hte Myen Mungdan kata mung Dinghku de sai amyu shayi 5 kaw nna yawm dik marai 1 gaw myit, hkum hkrang mazut roi rip ai lam ni hkrum sha nga ai re lam Myen mungdan masha ni a hkum hkrang myit hkam ja lam hte seng nna hta da ai Jahpan ni hta mu lu ai re.
2024 ning a amyu shayi ni a ntsa mazut roi rip manghkang hkoi tsai mat na lam hte seng nna n htoi 16 ya tup shamu shamawt ai lamang hta “အကြောင်းပြချက်မရှိ အမျိုးသမီးနှင့် မိန်းကလေးများအပေါ် အကြမ်းဖက်မှုများ အဆုံးသတ်ဖို အားလုံးပူးပေါင်း ဆောင်ရွက်စို့” ngu ai ga baw kata shamu shamawt ai re lam chye lu ai.
Comments