Pajau Media
16.10.2024
Myitkyina Mali Zup sa lam ntsa Alam mare kaw October shata praw daram kaw nna ya aten du hkra myen hpyen dap shamu shamawt nga dingyang re lam ginra masha ni tsun ai.
N-gun 10 grupyin lawm ai Myen hpyen dap hpung ni gaw Alam mare kaw October praw daram kawn wa shang nga ai lam, ya aten du hkra rai yang n htoi 10 ya jan wa sai re nga nna Mung masha langai tsun ai.
“October praw kaw nna rai sai, n-gun 10 grupyin re ai Myen hpyen dap gaw Mawdaw hte shara la nga ai, atsawm chyawm n chye ai. N htoi 10 ya gaw jan wa sai, ya du hkra naw nga taw nga ai, ngai chyawm n mu ai,” nga nna tsun ai re.
Myen hpyen dap gaw lam makau hkan na Mung masha dum nta hte Asuya Tsi Jaw Gawk ni hkan shara la nna ya aten du hkra nga nga ai majaw Mung masha ni gaw wang lu wang lang hkawm sa na matu hkrit tsang ra ai madang re nga nna ginra masha langai mung matut tsun ai re.
“Mare kaw myen hpyen dap ni naw nga ai majaw hkrit na gara pyi n gwi sa ai, shawng na bat hkan hkawm sa yu yang chyawm hkap jahkring ai lam n nga ai.”
Myen hpyen dap gaw lai wa sai September shata daram kaw nna Nawng Nang ginra kata hpyen hkring hte hkrak rai nna shamu shamawt ai lam nga ai zawn, Tang Hpare sa lam ntsa Lamung Zup hkan gate galaw nna lai wa lai sa ni hpe hkap jahkring gumhpraw hta ai lam ni galaw let Myitkyina Tang Hpare ginra mayan hpyen shamu shamawt ai lam ni galaw nga ai re hpe mung chye lu ai.
留言