Pajau Media Channel
June 19, 2024
Myitkyina muklum makau, Ake mare hte Hparaw mare lapran hta mani June shata nhtoi 18 Ya shani, KIA pawng hpawm hpyen hpung ni hte gum shem Myen hpyen dap lapran, gasat gala majan byin ai lam chye lu ai.
Mani June shata nhtoi 18 ya shani ka-ang hkying 12 grup yin aten daram hta Myen hpyen dap hpyen hpung ni gaw Ake mare maga de hpyen n-gun htu shadut lung wa ai majaw, KIA hpyen hpung ni hkap shingla gasat ai kawn, gasat poi byin wa ai rai nna, Myen hpyen dap kaw nna mung, lak nak kaba ni hte gap garum ai lam nga ai re.
Ginra masha ni tsun ai hta lahkawng maga hkrum katut majan minutes 20 daram na ai hpang Myitkyina muklum kata hta mung, lak nak kaba nsen ni na lu ai re hte hkying 2 hpang daw de gaw lak nak nsen hpe minutes 10 hta kalang ding yang na lu ai nga nna tsun ai.
Myen hpyen gum shem hpung ni gaw lai wa sai June shata nhtoi 17 ya jahpawt hta mung Ake mare hte Hparaw mare lapran na lam madung kaba hpe htu di kau ya lai wa sai re.
Dai lam kaba hpe htu di kau ya ai hpang, Ake mare makau grup yin hta Myen hpyen dap ni, hpyen n-gun htu shamu shamawt ai lam galaw wa ai nhtawm, mani gaw htim gasat majan byin ai re lam ginra masha ni tsun shana wa ai kaw na chye lu ai.
Comments