Pajau Media
10.1.2024
Dai ni ang ai 77 lang na Jinghpaw Mungdaw masat n htoi lamang hpe Myen hpyen dap kawn woi awn galaw ai hte Myitkyina Muklum Mungdaw asuya rung kaw Myen hpyen dap shimlam la ai hte galaw nga ai lam chye lu ai.
Dai hpawng lamang hta Myen hpyen dap asuya hpung shang salang ni, Munghpawm Hkringmang salang marai (9) sha n-ga M.P.Hk kaw nna ningbaw ningla, ginra P.T.Ts ningbaw ningla ni, Jinghpaw Htunghking hte laili laika hpung na lit nga salang ni sa du shang lawm ai lam chye lu ai.
Jinghpaw mungdaw masat n htoi lamang hta Jinghpaw amyu sha ni hpyen gasat padang dip ai aten nau ai Padang Manau hpe mung woi nau ai lam, Gat dut poi lamang ni galaw ai hte lamang hpe Myen hpyen dap shimlam grai shaja ai hte galaw ai lam chye lu ai.
Myen hpyen dap gaw 77 lang na Jinghpaw Mungdaw n htoi masat masa hku nna Ayarwaddy Shuhkintar (ဧရာဝတီရှုခင်းသာ) hpaw poi lamang, manau hpaw poi lamang hte htunghking hte seng ai madun gawk madun ai lamang ni hpe January (9) ya shani kaw nna galaw nga ai re hpe mung chye lu ai.
Dai sha n-ga KIO uphkang ginra rai nga ai Manje ginra Manwin mare lahta tsang jawng hte Jinghpaw Wunpawng Hkalup Hpung Nawku Jawng wang ni hta mung dai ni na Jinghpaw Mungdaw n htoi hpe galaw ai lam chye lu ai.
Dai hpawng lamang hta jawng ma ni hte kanu kawa ni, hpung magam gun ni wu wu di di rai galaw nga ai re hte jawng ma ni hku nna Jinghpaw mungdaw n htoi hpe hkap tau ai lam hpe manau ka ka let shang lawm ai re hpe chye lu ai.
Jinghpaw Mungdaw n htoi hpe lai wa sai 1948 ning January 10 ya shani hta Jinghpaw mungdaw n htoi ngu masat nna Myitkyina Shatapru lawk Manau Pa kaw manau nau lai wa sai rai nna 2025 ning hta 77 lang rai sai re hpe mung chye lu ai.
Dai sha n-ga Mung shawa ni a myit mada ai pandung rai nga ai rap ra ai hte dinghkrai uphkang hparan hpareng lu ai Federal Democracy Mungdan gaw gap lam, gumshem Myen hpyen dap hpe htum hkra gasat ai hta mung Mung shawa yawng shang lawm na lam ni hpe 77 lang na Jinghpaw Mungdaw n htoi hta “Kachin National Forum-KNF” hpung kawn n dau laika shapraw da ai re hpe mung chye lu ai.
Shiga - Zau Mai
Comments